Shillong, Naitung 05: Ka shnong Domiasiat kaba don ha South West Khasi Hills haduh mynta ka dang shah ieh bein haba iadei bad ki kam pynroi kum ka surok, ka jingduna ki jaka sumar bad ki skul, la ong ki nongshong shnong, da kaba dawa naka Sorkar ban tuklar kyrkieh naka bynta ban wanrah ki kam pynroi ha katei ka thain.
Ka shnong Domiasiat ka don 11 tylli ki longiing kiba dei ki baha iing jong i Meiieid Spility Lyngdoh Langrin (Bam Kwai Dwar u Blei), ka don tang kawei ka Government lower primary school.
Ki nong shong shnong ki im bad kamai ka kpoh daka ba rep Sohmarit, synsar bad ki jait soh bad da kam ri jingri kum ki Masi, Blang bad Syiar.
“Ngi dang ap ia ki jingdonkam ba kongsan kiba man ka sngi”.
Naka liang u Bah ND Syiem uba dei ruh u khun pyrsa jong i Meiieid Spility Lyngdoh Langrin u la ong ba ka roi ka par ha kane ka thain ka long kaba duna bha naduh ki por mynshwa.
“La bun snem mynta ka Sorkar ka shu iehnoh bein ia ki kam pynroi ha kane ka thain jong ngi. Lehse ka dei namar ka jingpyrshah jong ngi ia kata ka projek tih Uranium,” la ong u Bah Syiem.
U Bah Syiem ula kdew ba katba ka bording elektrik bad kawei ka Government LP School ka la don mynta hapoh shnong hynrei dang donkam shibun kiwei ki kam pynroi ym tang ha Domiasiat hynrei ha kylleng ki shnong ba marjan kynthup ïa ka Umdohlun, Wahkaji, Phlangdiloin bad Phlangmawprat.
Katkum ka jingong u Syiem, ki khynnah skul kim don lad shuh ban pule kham shalor ka Upper Primary hapoh ka thain.
“Haduh mynta ngi don tang haduh ka Upper Primary Level kaba dei ka skul Sorkar. Ngi donkam ïa ki skul Secondary bad Higher Secondary Level ha kane ka thaiñ,” u la ong.
U la kdew ba ka Wahkaji ka don ia ka skul Upper Primary, hynrei haduh mynta ka Sorkar kam pat lah wat ban kyntiew ia ka sha ka Secondary Level bad Higher Secondary.
Ka koit ka khiah ka dei kawei pat ka jingeh kaba khraw iaka shnong Domiasiat bad kiwei ki shnong ba marjan.
Ka Domiasiat kam don Dispensary, kaba pynlong ia ki nongshong shnong ban iaid 8 km sha Wahkaji ban ioh ia ka jingsumar wat hapdeng ka jingsniew ka surok.
“Ka surok na Wahkaji sha Domiasiat bad Mawthabah ka long kaba sniew bha,” la ong u Bah Syiem.
Ula iathuh ba ia kane ka surok Wahkaji sha Domiasiat la shna daka UCIL haka por ba ki thmu ban tih Uranium.
Halor ka jingdon ki nongtrei ka koit ka khiah, u Bah Syiem ula bynrap, “Ngi don tang kawei ka PHC ha Wahkaji kaba don tang 1 Doctor. Ngi kwah ba ka Sorkar kan wanrah shuh shuh ïa ki Doktor bad ban buh ruh ïa ki jaka thiah nongpang khnang ba ki briew kin ym donkam ban leit shaduh Shillong, Nongstoiñ ne Mawkyrwat”.
U Bah Syiem u la pynpaw ruh ïa ka jingbun ki jingpang kiba shyrkhei ha ka thaiñ, kynthup ïa ki nongpang cancer.
Ula pynpaw ia ki jingeh ha kaba iadei bad ki projek surok ki bym pat dep. U la kdew ïa ka surok Wahkaji–Phlangdiloin–Langpar kaba dei ban pynïasoh bad ka Ranikor kaba dei ka Headquarter jong ka Subdivision, hynrei haduh mynta kala shah pynsangeh.
“Kane ka surok kala sangeh noh ha ka shnong Langpar. Ha ka jingshisha la dei ban pyniaid shaduh Ranikor namar ba ka long kaba donkam bha na ka bynta ki shnong bad ka thain,” u la ong.
Ki shnong kum ka Nongmalang, Mawthabah bad Domiasiat ki don surok hynrei kine ki surok ki dei tang ban iaid ki masi bad kulai” ula ong.
Ka jingpynpoi um bam um dih ruh ka long kaba khlem ryntih bad ka bym pat biang” la bynrap biang u Bah Syiem.
“Khamtam ha Domiasiat ngi ioh um bam um dih lyngba ki pipe Jri bad haba jur slap, ka jingpynpoi um ka shah pynduh noh. Ngi kwah ba ka Sorkar kan maramot ia ka khnang ba kan long ka jingmyntoi ia ki paidbah.”
Ki nongshong shnong ki la kyntu ia ka Sorkar ban buh hakhmat eh ban pynbha bad kyntiew kyrdan ia ki skul, ban pynbha ia ki surok, ban pynthikna ia ka jingpynbiang um bam um dih, bad ban pynkhlain ia ki jingtei jong ki jaka sumar ha Domiasiat bad kiwei ki shnong ba marjan.
