Nongstoiñ, Naitung 05: Ki nongrep ka West Khasi Hills ki dap satang ka jinglyngngoh namar ba u riewhadem ba ki la dep thung shitom naduh ki bnai ba la dep, hynrei mynta la bam lut ploiñ da u khñiang.
U nongthoh khubor hadien ka jingïoh jingtip ula leit jurip kylleng ki jaka, bad lap ba kiba bun na ki nongrep ki la hap ban shu bret ïa u riewhadem ba ki la thung shitom, namar ka jingwan lynshop kyndit kynsan da u khñiang.
Haba pyrshang ban lum jingtip kaba kham bniah ha shnong Nongdom Umyiap, ki nongrep ki la pyni ba u jait khñiang u ba khyllah u la bam lut ïa u Riewhadem ha baroh kawei ka kper, kat haduh ba ym shym la ïoh kheit ruh wat tang uwei u riewhadem na baroh kawei ka kper.
Kane ka jingwan lynshop ki khniang kala jia ruh ha shnong Siejlieh Nongstoiñ bad ha ki katto katne tylli ki shnong kiba don ha ka thaiñ Nongstoiñ bad ha ka West Khasi Hills District hi baroh kawei.
Ka kong Lantina Wahlang na ka shnong Nongdom, Umyiap Nongstoiñ, ka la ïathuh ba ka la lap ïa kine ki jait khñiang naduh kine ki khyndiat taiew ba la dep. Ka la ong ba haba ka pyrshang ban pied ïa ki katto katne tylli ki riewhadem ban pynshisha ïa ka jingshah bam khñiang, ka la ïohi ba kitei ki khñiang ki don hapoh u riewhadem bad ki don ïa ka dur kaba ïasyriem kum ki Ñiangpar.
Ka kong Lantina Wahlang ka la ïathuh ba jing bam khñiang u riewhadem, ka la wanrah ka jingduhnong kaba khraw ïa ki nongrep ka thaiñ mynta u snem.
Ki nongrep ki la kyntu ïa ka tnad ba dei peit ïa ka rep ka riang ba kin pynlong ïa ka jingwad bniah bad ban thaw ki lad ki lynti ban ïada na ka jingbam duh kine ki khñiang ia u jingthung.
