Shillong, Jylliew 3: Hapdeng ka jingduna jong ka jinghap slap ha u bnai Jylliew, ka Meghalaya Energy Corporation Limited (MeECL) kala pynkynriah ia ka rukom pynmih bording ban shaniah ha ka bording ba pynmih na ka Thermal bad Solar, ong u Commissioner & Secretary uba khmih ia ka tnad Bording u Sanjay Goyal, hynne ka sngi Thohdieng.
Ula pynthikna ba ka jingsam ia ka bording ha kylleng jong ka jylla kan long kaba biang ha baroh u Naitung bad Nailar watla ka don ka jingduna ha ka rukom pynmih bording lyngba ka um. Hooid ka jingslap mynta ka snem kala long kaba duna bha ban ia kaei kaba ngi lah khmih lynti bad ia katei lah dep ban pynskhem da ka IMD ruh” ong u Goyal.
“Lada phi kren shaphang u Bnai ba lah dep uba dei u bnai Jylliew, uba bunsien u dei u bnai uba ioh bha ia u slap. Hynrei la sakhi pat ia ka jingioh duna ia u slap”.
Ula ong, ba ka tnad ka lah dep ban shimkhia ha kaban pynbiang ia katei ka jingduna.
“Namar kane, ka MeECL kala treikam biang ha kaban pynwandur biang ia ka rukom treikam ha kaban pynmih bording elektrik bad ngi lah sdang pyntreikam ia ka jingdonkam ka jong ngi na ka jingiatehkular ban shim da ka bording kaba pynmih na ka ‘Thermal’ bad kumjuh ruh ban shim ia ka bording kaba ngi lah shim na ki Solar Generators,” ula ong.
“Kumta ngi lah pynkhlain ia katei ka bynta hadien ba la sakhi ia ka jingduna palat ia ka jingioh ia u slap”.
Ka jingtlot ha ka jingioh bha ia u slap kala ktah ia ka pung Umiam kaba dei kaba lam ia ka jingpynmih bun ia ka bording ha ka jylla.
“Ha ka pung Umiam, ka long kaba phylla ba kala duna bha ka jingslap” ong u
Goyal.
“Kaei kaba ngi thmu ha u bnai Jylliew, da kaba buh ha ka jingmut jingpyrkhat ia katto katne na ka jingslap, kam shim la treikam. Kumta ngi lah ban pynkhreh biang ia ka rukom treikam”.
Ka Umiam Stage I, kaba ju treikam pura ban pynmih 36 Megawatt hynrei ha une u snem ka jingpynmih ka jongka kala long hapoh jong katei ka jinglah ban pynmih.
“Ngim shim la leh ia katei namar ba ka jingkiew jong ka um kaba ngi lah khmih lynti ha u bnai Jylliew kam shim la jia satia” ula batai.
“Kane kala pynduna ia ka jingpynmih na ka Umiam Stage I bad kumjuh ruh ia baroh ki Stage haduh ka Stage IV bad ka Umtru kaba thymmai kaba don sharum”.
Wat hapdeng jong ka jingpynmih duna ia ka bording na ka um, u Goyal ula ong ba kam don pat kano kano ka jingma ban duna ka dorbing.
“Ha baroh hi, ka jinglong jingman ka dang biang ha kata ka rukom namar ba ngi lah dep ban iateh lypa na ka bynta u Naitung bad Nailar da kaba pyniaid ia ka jingpynmih ia ka bording bad ban pyniaid ia ka jingthied ia ka bording na shabar ka jylla lyngba ki tnad bapher bapher” ula ong.
“Ngam iohi ban don kano kano ka jingduna ha kaba iadei bad ka jingsngewkhia ia ka jingdon ia ka bording” ula bynrap.
“Lehse ngi hap ban khmih ia ka rukom pynmih ia ka bording, kaba kynthup ia ka Hydro, Thermal, Wind bad Solar. Kaba lah don ka jingkylla malu mala namar ka jingduna slap mynta u snem”.
