Shillong, Naitung 03 : Ka Meghalaya ka dang bishar ia ki jingtyrwa ban pyntrei ia ka Thermal Power Plant la ka jong ha Jylla haba pynthikna ia ka jingsam bording ka bym don jingthut wat hapdeng ka jingnang hiar ka jingpynmih bording na ki Hydro Project bad ka jingkiew ka dor thied, ong u Commissioner & Secretary ka Tnad Bording, Sanjay Goyal ha ka sngi Thohdieng.
U pyntip ba ki jingiakrren bad ki nongpyntrei (developers) ia ki Thermal Power Plant kila iaid shakhmat.
“Ngi la wad ia ki lad ki lynti bad ngi la ioh pdiang ia katto katne ki jingpynpaw ba kwah (expression of interest) na ki katto katne ki kompani. Ngan nym pat ong ba ka dei ka lynnong kaba la khylliap” ong u Goyal.
U bynrap ba ia ki jingdonkam ba mynta halor ka bording ba pynmih na ki thermal plant la ioh da ki jing iateh bad ki kompani na shabar ka Jylla.
“Haba iadei hi bad ka jingthied bording, namar ka jingioh ia ka bording na ka NTPC, Bongaigaon, ngi la biang haba phai sha ka jingioh bording thermal” ula ong.
“Hynrei hooid, haba iadei bad ka thermal power plant hala iing, ki kam kila don ha ka jingpynkhreh bad nga khmih lynti ba kawei ka project yn sa rai iatehlok noh ha ki sngi ban wan” ong u Goyal ba ka Tnad bording kala pynleit jingmut ia ka jinglah ban ioh bording baroh lang ha ka jaka ka jingpynmih tang na kawei ka tyllong.
“Ka jingdon jong ka bording kam dei eh tang na ka jingioh ia ka bording lyngba ki Hydro, ka Lyer lane ka Thermal. Ka dei halor ka jingioh bording baroh lang” ula ong.
Ka jingdawa bording ha Jylla ka kot ia ak 180 haduh 200 megawatt, da ka jingpynmih bording kaba ap na ki jinghap u slap.
“Lada ngi pynmih bording na baroh ki station na ka jinglah pynmih kaba pura, ka iaid palat ia ka 200 megawatt. Hynrei kane kam donkam satia” ula ong bad bynrap “Ngi buh hakhmat ia ki station kiba tuid ki wah.
“Ngi plan ia ka jingpynmih bording jong ngi kat kum ka jingioh slap, khamtam na ki project ba don ha ki wah, kum ka Leshka bad ka Ganol” batai u Goyal.
“Kumta, ngi pyndonkam ia kine ki power station haba iadei bad ka jingpynmih bording haba buh ia ka Umiam kum ka reservoir bad ban pyndap um ha ka reservoir” ula ong.
