Shillong, Naitung 01: Ka jingtyrwa ban shna ia ka surok 4 Lane na Rilbong sha Barik kan sa urlong noh shen hadien ba ki shipai ki la pdiang ia ka jingthmu (plan) jong ka Sorkar Jylla, ong u Myntri Rangbah ka jylla u Conrad K Sangma haba bynrap ba shen un sa leit iakynduh ia u Myntri ka Ministry of Road Transport ka Sorkar Pdeng Nitin Gadkari ha Delhi ban ioh ia ka jingmynjur kaba khatduh
U Conrad u la ong ruh ba ka Jylla ka dang pynkhreh ban ioh iaka surok 4 Lane na Umiam–Shillong, ka ban kynthup ia ka suroi rim bala don mynta bad ka surok thymmai (Greenfield) ban pynsuk ïa ka leit ka wan sha nongbah Shillong.
“Ngan sa ia kynduh ruh ia u Nitin Gadkari ha kane ka jingleit jong nga sha Delhi. Kane ka long, shisha, kaba iahap bad ka jingwan jong u sha Shillong dangshen”, la ong u Myntri Rangbah ka Jylla.
U la pynkynmaw ba une u Myntri ka Sorkar Pdeng ula pynbna iakatto katne ki projek ha ka jingwan sha Shillong.
“Lada phi kynmaw, ki la don shibun ki projek thymmai kiba u la kular, hynrei katto katne ki projek ki dei kiba dang donkam ban ïakren kham bniah, kynthup ïa ka surok 4 Lane na Rilbong sha Barik” ula ong.
Ban pynurlong iaka iaid projek 4-lane na Rilbong–Barik, ka Sorkar ka la pynlong ia ka jingialang bad ki tnat ba kongsan. “Nga la shong ia ka jingialang kaba bniah bad JOC, NHIDCL, PWD, ki bor district, bad baroh kiba don bynta”, u la ong.
“Ka jingthmu jong kata ka jingialang ka long ban weng noh iaki jingeh ki ban khanglad ia kane ka Project. Watla baroh ki ia mynjur lang, kine ki dei ki mat kiba bniah kiba ngi donkam ban ïakren sani bha bad kumta ngi la ioh ia ka jingialang seisoh” u la bynrap.
U Conrad u la ong ba ka jingmynjur jong ki shipai ka long kaba kongsan bha bad mynta la lah ban pynthikna. “Ngi la poi sha ka jingiasngewthuh jingmut. Shisien ba ki shipai ki la iohi ia ka jingthmu (Plan) kaba ngi la don, ki la pdiang bad ki la ai ia ka jingbit ban iaid shakhmat iaka surok” u la ong.
Katkum ka jingong u Myntri Rangbah, u Gadkari u la kular ban iarap mang pisa naka bynta ka surok tang lasa ioh NOC na ki shipai.
“U Myntri Sorkar Pdeng u la ong ba u kloi ban ai ia kane ka project surok 4 Lane tangba dei ban ioh NOC na ki shipai, bad kumta, ngi la trei shitom bha bad ngi la ioh” ula ong.
“Nga sngew kmen haduh katta katta ba ngi la lah ban wanrah ia ka. Hooid ngi hap ban ap ia ka rai ba khatduh na Delhi, hynrei ngi dang pynkhreh ia kata” ula ong.
“Bad nga kyrmen shibun ba ha kane ka jingleit sha Delhi, ngin sa lah ban rah ïa kane ka projek sha u Myntri Sorkar Pdeng ban ioh iaka rai kaba thikna,” u la bynrap.
Halor ka surok 4 Lane Umiam–Shillong, u Conrad u la ong ba ka jingpyrkhat ka long ban pynkham suk ban rung shapoh ka nongbah Shillong.
“Ka projek kaba ar kaba nga la bishar bniah ka dei kaba ïadei bad ka surok 4 Lane na Umiam sha Shillong. Shi bynta kan long ban pyniasoh lang daka surok thymmai (Greenfield), shi bynta kan long naka surok rim (Brownfield). Ka jingmut ka long ban wanrah iaka iaid ka ieng kaba kham suk haba rung sha Shillong, bad ngi don ka jingkyrmen ba ngin ïoh ïa ka rai kaba bha na ka Sorkar India” u la ong.
U Myntri Rangbah ula kam ba kane ka mat kam dei kaba suk naduh ba ka dang don haka jingiakren.
“Kumta, ngam shym la lah, hoid, kumba nga la ong ki la don shibun ki jyrwit jyrwar kiba donkam ban pynbeit. Ka jingpynbeit ryntih ka dei kaei kaei kaba —ha ki katto katne ki jaka ka NHIDCL ka mynjur, bad haki katto katne ka PWD ka ong ba ngim don ïa ka jaka hangne, ngi ïakynduh shibun ki jingeh” ula ong.
“Kumta nga kyrmen shibun ba ha kane ka jingleit sha Delhi, ngin sa ïoh ïa ka jubab kaba kham shai bha naka Sorkar Pdeng halor kaei kaba ngi leh,” ula bynrap.
