Guwahati, Risaw 06: Ka Deepshikha Hazarika kaba dei ka nongshong shnong ka Rajgarh ha ka nongbah Guwahati ka Assam ka dei napdeng bun phew ngut ki briew kiba la jah rngai hadien ba ka kynhun jong ki nongkiew lum kaba kala ia don bynta kila ngat ha ka jingtwa jong u lum thah ha Uttarakhand.
Ia ki 14 napdeng ki 41 ngut ki nongkiew lum kiba dei na ka Nehru Institute of Mountaineering (NIM) kiba la sahkut hadien katei ka jingtwa jong utei u lum thah Draupadi Ka Danda II ha kane ka sngi ba Ar ba la lah la ioh ban pyllait im kat haduh mynta.
Ka thain shatei lammihngi (Northeast) ka don ia ka list jong kumba 28 ngut ki nongkiew lum kiba la jah rngai ha katei ka jingjia.
Ka Deepshikha Hazarika kaba la don bynta lang ha katei ka list jong ki dkhot kiba la jah rngai ka dei ka khun jong u Golap Hazarika.
Katei ka kynhun jong ki 41 ngut ki dkhot nongkiew lum kala ngat ha ka jingtwa jong u lum thaw katba ki dang wanphai ha ryngkat ki nongai jinghikai jong ki hadien ba kila kiew ia une u lum.Katei ka jingtwa jong utei u lum thah kala jia ha ka sngi ba Ar ba la lah ha ka por 8.45 mynstep.
Hadien ba la jia katei ka jingtwa jong u lum thah, na ka liang ka NIM kala pynpaw da kaba ong; “Katei ka kynhun kala wan poi ha Base Cap ha ka 25 tarik u Nailur ba la dep.Katkum ka por aijinghikai ba la buh ka dei ha ka 4 tarik mynta u bnai, kane ka kynhun kala shim bynta ha kaba kiew sha ki bynta ba shalor jong u lum Draupadi Ka Danda-II, kata ha ka kynjang kaba (5670m) ha ka por 4.00 mynstep, hynrei katba ki dang wanphai kane ka kynhun kala ngat ha ka jingtwa jong u thah sha ki bynta ba shalor jong ka camp 1 kaba la pynlong ruh ia ki 34 ngut ki nongshah hikai bad 7 ngut ki nonghikai ba kin ngat ha kane ka jingtwa ha ka por 8: 45 mynstep.
Nalor kata kala ong ruh ba ki kam aijingiarap kila iaid shakhmat bad haduh mynta hi la lapdien ia ki sawtylli ki metiap.Na ka liang ka tnat SDRF, NDRF bad ki shipai ka Indian Air Force kila iashim bynta lang ha kane ka kam aijingiarap.
