Guwahati, Risaw 06 : Hadien ka jingkhlad jong ka aktres khynnah, ka Tejaswita Baruah halor ka jingkynnoh leh thurmur da ka tnat aijingsumar, na ka liang ka tnat ka koit ka khiah kala sospon noh ia ka Superintendent jong ka Majuli Garmur Civil Hospital ha Garmur.
Kane ka Superintendent, ka Dr Amulya Goswami hadien ba la pynlong ia ka jingtohkit la pynsangeh kam noh ia ka da ka tnat ka koit ka khiah.
Lah ban kdew ba ka Tejaswita Baruah 14 snem rta na Majuli kala kem pang kynsan katba ka dang iashim bynta ha kaba rwai hynnin ka sngi Balang.
Hadien kane la pynkit noh ia ka mardor shapoh Civil Hospital hadien ba kala khlad noh hapoh kane ka jaka sumar namar ka jingkynnoh kaba iadei bad ka jingduna ia ki tyndong oxygen.
Hadien kane ka jingkhlad noh jong kane ka khynnah, na ka liang ki nongshong shnong kila kynnoh ba kala don ka leh sting ha ka liang ki nongai jingsumar kiba sumar ia ka.
Kila don ruh ki khubor kiba ong ba la wan peit ia ka da ka doktor kaba sumar ia kiba pang khmat kaba la lam sha kane ka jingjia ba sngewsih.
Nalor kata na ka liang ki trai shnong kila ong ruh ba kane ka hospital hapoh ka district ka duna ha kaba iadei bad ka jingdon ki doktor bad namar kane ka daw haba jia ki jingdonkam jingsumar ba kyrkieh ka ju wanrah ka jingeh kaba khraw na ka bynta jong ki.
Kiba bun kila pynpaw ruh ba namar ka jingshem jingeh ha kaba iadei bad ka leit ka wan, na ka liang ki nongshong shnong kim lah satia ban leit sha kiwei pat ki district haba ki donkam kyrkieh ia ki lad jingsumar.
