Shillong, Jylliew 30 : U Myntri Rangbah ka Jylla Conrad K Sangma ha ka sngi Ba-ar, ula iathuh ba ka Maharashtra kala mynjur ban ai ia ka jaka ban tei ia ka Meghalaya House ba thymmai ha Navi Mumbai ha ka dor Sorkar ba T.7 klur ha ka jaka ka dor iew ba T.90 klur, bad ka Telangana ruh kala kular ban ai jaka ia kajuh ka jingtei ha Hyderabad.
Haba iakren bad ki nongthoh khubor, u Conrad ula ong ba kine ki Jingtei kin dei na ka bynta u paidbah ba kin shakri khamtam eh ia ki samla pule, ki nongpang bad ki nongshongshnong kiba leit donkam sha kine ki sor metro.
“Ka Sorkar Maharashtra kala mynjur ban ai jaka ia ka Sorkar Meghalaya ba kan tei ia ka Meghalaya House. Ka jaka, kaba dang thymmai, ka don ia ka dor iew ba T.90 klur. Nga la kyrpad ia u Myntri Rangbah ba lada u lah ban ai ia katei ka jaka sha ngi ha ka dor Sorkar kaba long T. 7 klur” ong u Conrad.
Ula bynrap “Nga sngewkmen ban pyntip ba ka Sorkar Maharashtra kala ai ha ngi ia ka jaka ym ha ka dor T.90klur lane ka dor iew. Nga thikna ba kane ka jaka ba thymmai, kaba ngi ioh ha Maharashtra sha ka phang ka Navi Mumbai, kan long ka jingmyntoi kaba khraw ia ki briew jong ngi bad ngi khmih lynti ba ngin lah ban buh ia ki jaka paidbah kiba heh ha katei ka jaka”.
U Myntri Rangbah ula pyntip ba ula bthah ia ki Ophisar ba kin pynleit jingmut halor ka jingpyndonkam u paidbah. “Nga la kren shai bha bad ka kynhun jong nga ba kane ka Meghalaya House ka dei ban long eh na ka bynta u paidbah, kaba long eh kum ka guest house, kaba ailad kham bun ia ki samla pule, ki nongpang bad kiwei I briew kiba donkam ia ka jaka ba kin sah” ula ong.
U Conrad ula pynbna ruh ba ka Telangana kala mynjur ban ai jaka ha Hyderabad. “Ha ka jingleit iuhkjat jong nga dang shen sha Hyderabad, Nga la ioh ban iakynduh ia u Myntri rangbah ka Telangana. Nga la thoh shithi ruh sha u bad kyrpad ia u ba ka Sorkar Meghalaya kan ai jaka na ka bynta ka Meghalaya House ha Hyderabad, namar ka Hyderabad ka dei kawei ka sor metro bad ki don bun ki nongshongshnong jong ngi ha katei ka sor” ula ong.
“Nga sngewkmen ban pyntip sha phi ba u Myntri Rangbah ula mynjur ban ai jaka ia ka Meghalaya ha Hyderabad ban tei ia ka Meghalaya House. Ngin sa ioh shen ia ka jubab da ka jingthoh” ula ong.
Haba ai jingkhein ia ki project ki ban nang wan, u Conrad ula ong “Khlem pep kan dei ka sienjam kaba sngewtynnad bha ha kaba ngin sa ioh ia ki Meghalaya House ba thymmai, nalor ka Greater Noida ha Uttar Pradesh bad ha Bangalore, ka jaka thymmai ha Navi Mumbai, ka jaka ha Hyderabad bad ngin sa pyntrei ruh ia ka Meghalaya House ba thymmai ha Vellore. Ki kam jong kane ruh kin sa sdang noh shen”.
U iathuh ba ia ka jingtei ba don mynta ha Vellore yn sa pynkylla noh kum ka guest house ba aiwai katba ka jingtei ka dang sdang.
