Shillong, Jylliew 30: Ka Confederation of Meghalaya Social Organisations (CoMSO) ha ka sngi Baar, kala iawer ia ki kynhun ka jaidbynriew, ki seng sain pyrthei, ki khlieh nongsynshar bad ia ki nongshong shnong ba kin iashimbynta ha ka Special Intensive Revision (SIR) jong ka Electoral Roll, haba pynpaw ba ka SIR ka long kaba kongsan bha ha kaban iada ia ka hok ki paid riewlum ha ka riti synshar bad sain pyrthei.
U Chairman ka CoMSO u Bah Roy Kupar Synrem, ha ka kyrwoh ula banjur ba ka SIR ka kham long kongsan shuh shuh ban ia ka jingkyntiew ia ka thup kyrteng jong ki nongthep vote.
“Ym dei ban shim ia ka SIR kum ka jingleh ha kaban pynbeit man la ka por ia ka thup kyrteng hynrei kadei ka kabu kaba kham pher ban pynthikna ba ka Electoral Roll kadei ban long kaba lait na ki bym dei hok ne ka jingpynrung kyrteng kaba artatien” ula ong.
Ula maham ba ka jingshongsbai jong ka jingsynshar paitbah kan shong eh ha ka jingdon ia ka thup kyrteng kaba khuid.
“Ka jingkhuid jong ka Electoral Roll kadei u paia jong ka kam synshar paitbah. Lada lah iapein noh ia ka Electoral Roll, ka jingshongaiñ jong ka jingtreikam jong ka jingsynshar paitbah kan shah pyntlot bor noh” la pynpaw u Bah Synrem.
Katkum ka jingpynpaw ka CoMSO, ki kynhun jong ka jaidbynriew kila iai bteng ban pynsngew ia ka mat jong ka jingwan rung be-aiñ jong ki briew kiba nabar, ka jingkylla jong ka rukom long rukom man bad ka jingdon ki kyrteng kiba artatien kiba mih ha ka Electoral Roll.
U Bah Synrem ula ong ba ka SIR ka ailad ia ka lynti jong ka ain bad ka jingkhuid jingsuba ban pynshisha ia ki kot ki sla, ban pynduh noh ia ki kyrteng thok (Duplicate) bad ia ki nongthep vote kiba la khlad noh, ban pynbeit ia ki jingbakla bad ban pynthikna ba dei thik tang ki nongthep vote kiba pura kiban ioh rung kyrteng.
Ka Confederation kala kyntu ia ki Dorbar Shnong, Nokma, ki nongialam shnong, ki nongialam ha ka imlang sahlang ba kin khmih bniah bha ia ka rukom pynshisha ia ki nongthep vote.
“Na ka bynta kito kiba la tip bha ia la ka shnong ka thaw, ki don ia ka bynta kaba kongsan ban ithuh ia kino kino ki jingkam kiba long artatien, ka jingpynrung thok bad kiwei kiwei ki jingduna da kaba iaid katkum ki lynti jong ka ain ha ryngkat bad ka pynthikna ba ym dei ban don uwei ruh u nongthep vote uba dei hok yn shah kyntait noh” la ong ha ka kyrwoh.
Ka CoMSO kala kyntu ia ki seng sain pyrthei bad ia ki kyrtong kiba iakhun elekshon ba kidei ban buh shwa sharud ia ka jingiapher ha ka politik.
“Kane ka mat kadei kaba sngewkhia halor ka hok jong ka riti synshar ia man la ki nongshong shnong tynrai palat ban ia kano kano ka seng sain pyrthei, ong u Bah Synrem bad ka kyntu ba dei ban ia shim lang ia ki sienjam ban iada ia ka thup kyrteng jong ki nongthep vote.
“Kane kadei kaba donkam ia ka jingkitkhlieh lang. Ka lawei jong ka jingmihkhmat ha ka kam sain pyrthei jong ki jaidbynriew trai ri trai muluk kan shong eh ha ka jingdei bad ka jinglong hok jong ka Electoral Roll. Baroh ki nongshong shnong kiba dei hok kidei ban iatreilang bad ki bor kiba dei khmih bad ban long kiba peitngor khnang ba ka Electoral Roll kan pyni shisha ia ki nongthep vote kiba dei hok jong ka Meghalaya,” ula bynrap.
 ha ka sngi Baar, kala iawer ia ki kynhun ka jaidbynriew, ki seng sain pyrthei, ki khlieh nongsynshar bad ia ki nongshong shnong ba kin iashimbynta ha ka Special Intensive Revision (SIR) jong ka Electoral Roll, haba pynpaw ba ka SIR ka long kaba kongsan bha ha kaban iada ia ka hok ki paid riewlum ha ka riti synshar bad sain pyrthei.){kind=link}