Shillong, Jylliew 30 : U Myntri Rangbah ka Jylla Conrad K Sangma ha ka sngi Ba-ar ula pyntip ba ka Jylla kan sa buh ia ka Unified Command hapoh ka jingkhmih u Director lane CEO ban pynjanai ia ka jingiatreikam lang hapdeng ki Tnad da kaba pyndonkam ia ka Integrated Command and Control Centre, haba kdew ia ka rukom treikam (model) na Hyderabad kaba pynkloi ia ka jingai jingshakri da ka jingioh kloi ia ki data bala pyniasoh hapdeng ki drone, camera bad ka jingshakri ha ka koit ka khiah.
Haba pyniaid ia ka jingialang bishar kam bad ka kynhun ICCC, u Conrad ula ong ba ka tnad Pulit, IT, Urban Affairs, Municipal bad kiwei ki Tnad kila sdang ia ka jingiatreilang ha ka ICCC.
“Ka Tnad Pulit, ka Tnad IT, ka Tnad Urban Affairs, ka Municipal bad ki tnad bapher bapher kila iatreilang bad ka ICCC kala iarap bha ia jan baroh ki Tnad kiba iatreikam hapoh ka ICCC hynrei ka thong jonng ngi ka long ban khmih ba kumno ngin nang lah ban pynjanai ia ka jingtreikam ka ICCC bad pynlong ia ka kaba kham treikam bha” ula ong.
U Myntri Rangbah ula ong ba u ihun shisha ban peit ia ka ICCC ka Hyderabad kaba ula wan jngoh ha ki khyndiat sngi bala leit, khamtam ka jingpyniasoh lang ia ki field unit bad ka Control Room.
“La ka dei ka jingiasoh ne ka jingiatreilang hapdeng ki drone ba ki don bad ka jingpyniasoh ia ki drone sha ka ICCC, la ka dei ki microphone bapher bapher bad ki speaker ba ki don, ki lah ban ai ia ka hukum beit beit sha kiba don ha ka ICCC sha ki Police Point kaba ki kwah ban phah ia ka khubor lyngba ki speaker – Kum kane ka micro management la leh ha ka Jylla kum ka Telangana” ula ong.
U Conrad ula ai nuksa na Telangala ha kaba ia ki video aksiden la phah mar mar sha ka Tnad ka Koit ka Khiah, kaba pyntip pat mar mar sha ki hospital ba marjan bad phah ia ki ambulance ban pynkit ia kiba mysaw.
Ban pyntreikam lang ia kane, ka Jylla kan thaw ia ka rukom treikam kaba paka ka ban pyniasoh ia ki tnad bapher bapher bad ailad ia ki ba kin iatreikam lang ha ka rukom kaba dei. “Ka jingialang kala iakren ia ka jingbuh ia ka Unified Command kaban don u khlieh u ban pynthikna ia ka jingiatreikam lang.
Ka Sorkar ka don jingthmu ruh ban pyniar ia ka jingtreikam jong ka ICCC shabar jong ka Shillong.
 na Hyderabad kaba pynkloi ia ka jingai jingshakri da ka jingioh kloi ia ki data bala pyniasoh hapdeng ki drone, camera bad ka jingshakri ha ka koit ka khiah.){kind=link}