Guwahati, Jylliew 30: Haduh 37 kg ka ksiar ba 24-carat kaba shong dor kumba ₹55 klur la ioh ban kurup na ka thain Kharghuli ha Guwahati, ha kawei na ki jingioh kurup ksiar kaba heh tam ha Assam ha kine ki snem ba la dep, kaba la pynpaw pyrthei ia ka jingdon ka kynhun khaii tuh kaba don jingiadei bad ki Ri ka Middle East.
Ki pulit ki la kem ia uwei u briew na Maharashtra ha kaba iadei bad katei ka kam.
Da kaba leh katkum ki jingtip ba ioh halor ka jingleit jingwan jong ki ksiar ba shalan tuh, ka kynhun na Latasil Police Station ka la pynlong ïa ka jingkhynra mynmiet ha ka sngi Nyngkong bad ki la bat ïa u Akshay Bansure (32 snem), uba dei u nongshong shnong jong ka Sangli district ha Maharashtra.La kynnoh ba utei u briew u rah artylli ki pla ba la thep ia ki ksiar (gold bars) ha ka por ba la kem ia u na ki thain Kharghuli.
Haba kren ha ki lad pathai khubor, u Deputy Commissioner of Police (Central) ka Guwahati ka Sambhabi Mishra u la batai ïa kane ka jingioh kem kum kawei na ki jingjop ba khraw jong ki pulit ka Guwahati. Ka la ong ba ki ophisar ha kaba sdang ki la ioh jingtip halor katei ka jingshalan beain hynrei kim don sakhi satar. Ka jingtip ba thymmai kiba lah ban ngeit hadien ki la pynlong ia ka jingtreikam, kaba la ialam sha ka jingkurup bad kem.
Ki pulit ki la ioh ban kurup 36.826 kg ka ksiar kaba 24-carat, ba kynthup ia 42 one-kilogram bars, ka ksiar kiba khia 10 gram kawei kawei, bad sa 50 gram ka ksiar.Ki ophisar ki la kurup ruh saw tylli ki mobile phone—ar tylli ki iPhone bad ar tylli ki Android— ryngkat bad ki lyngkhot nar rupa bad kiwei kiwei ki tiar na ki nongshah kynnoh.
Ha ka jingtohkit ba nyngkong ka pyni ba u Bansure u la kynnoh ba u trei na ka bynta ka kynhun khaïi ksiar kaba kham heh kaba lah ban don ka jingïadei bad ka Middle East bad ki nongbah ba heh jong ka India, kynthup ïa ka Mumbai, Delhi, Kolkata bad Bengaluru.
Ha ka por ba tohkit, la iathuh ba U Bansure, u la iathuh ha ki nongtohkit, ba u la sah ha Guwahati, ha ki ar bnai ba ladep, hadien ba u la shah thung kam ban kit ia ka ksiar ba la shalan beain.La kynnoh ba u la pynpaw ba u la shah siew ₹80,000 shibnai bad u la kit da kaba suk kumba 15 haduh 20 kg ka ksiar ha ki lai tylli kam ba kham mynshwa.La iathuh ba katei ka mar ba la kurup ka dei ka kam kaba saw jong u shwa ba un shah kem.
Ki nongtohkit mynta ki dang bishar bniah ïa ki jingtip ba la ïoh kurup na ki mobile phone ba la kurup bad wad ïa ka lad ki lynti jong ka pisa ban lap ïa kiwei pat ki dkhot jong ka kynhun ba la kynnoh, ban pynthikna ïa ka tyllong bad ka jaka ba leit jong ka ksiar, bad ban tip la ka Guwahati ka dei kaba la pyndonkam kum ka jaka pdeng ba pyndonkam ki nongkhaii beaiñ.
Ka jingtohkit ka dang iai bteng.
