Dawa ka UBHF ia ka Sorkar ban pynbiang ia ki jingdonkam ha Umsning CHC

Shillong, Jylliew 30 : Ka Umsning Block Headman Forum (UBHF) kala dawa ia u Myntri ka Koit ka Khiah Bah Wailadmiki Shylla ban leh eiei noh kham kyrkieh halor ki jingduna kiba don hapoh ka Umsning Community Health Centre (CHC), haba maham ba ka jingbym biang ki jingdonkam kiba kongsan kalah ban shim ia ki jingim briew ha Ri-Bhoi District.

Ha ka shithi bala aiti ha ka sngi Ba-ar, ka Forum kaba mihkhmat ia kumba 200 tylli ki Shnong kiba hap hapoh ka Umsning C&RD Block, kala ong ba ka CHC ka dang dei tang ma ka na ki hospital Sorkar ba don ha ka thain bad kala treikam khlem ka jaka sumar ia ki shynrang ne male wards mynta la jan shiphew snem.

“Kane ka buh ha ka jingkit kaba khia ia ki nongpang kiba wan na ki longiing kiba duna ka jingioh na ki jaka nongkyndong. Naba ka dei tang maka ka jaka sumar ka Sorkar ba don ha ka thain, katti katne ki nongpang kila shu duh iala ka jingim namar ka jingbym biang ki lad ai jingsumar” ong u President ka Forum Franklin Nongrum ha ka dorkhas.

Ka Forum ka ong ba ka jingduna ki doktor ka dei kawei na ki jingsngewkhia kaba khraw, namar ka CHC ka khmih ia kumba 250 tylli ki nongpang ha ki OPD ha ka shisngi, kaba kiew sha ka 400 ngut ha ka sngi Iew. Ka jingbun ka kam, nalor ka jingtrei miet, kala ktah jur ia ki katto katne ki doktor kiba don ha kane ka jaka sumar.

Wat hapdeng ka jingkyntiew kyrdan n aka PHC, ka CHC ka don don shibun ki jingduna kiba donkam kat kum ki kyndon ka Sorkar, kaba pynbor ia ki nongpang ban hap leit wad jaka sumar bad leh test sha kiwei pat ki jaka sumar.

Ka Forum ka pynpaw ba kane kala nang tynrong ia ka jinglut kaba bun ia kito kiba wan na ki longiing kiba duk bad kyntu ia u Myntri ba un tuklar mardor ia kane ka kam.

Kala pynsngew ruh ia ki jingduna ha ka Meghalaya Health Insurance Scheme, bad ong ba ka MHIS kan kham treikam bha lada ka siew pat ia ki bill bai sumar haba ki test kim don satia hapoh ka CHC.

Ban pynsting ia ka jingkit ha Umsning, ki Rangbah Shnong kila tyrwa ban shna ia ka PHC ba thymmai ha Kyrdemkulai lane kyntiew kyrdan ia ka Zero Point Sub-Centre ha ryngkat ka jingkyntiew kyrdan ia ka Umsawlum, Mawlyndep lane Mawlang Sub-Centre.

Kane ka jingkyntiew kyrdan kan iarap ia ki nongshongshnong na ki thain Eastern-West kiba shaniah tylli ia ka Umsning CHC, ong ka shithi.

Ka Forum kala ai jingmut ruh ban buh ia ka mobile blood donation vehicle ban kyrshan ia ki nongpang bad pynsuk ia ki briew na ki jaka nongkyndong, ki skul bad ki jaka trei ba kin synniang snam khlem da donkam ban wan sha ki hospital.