Shillong, Jylliew 30 : Ka Sorkar kala thaw thymmai ia ki lai tylli ki Regional Committee ki ban khmih ia ki hynriew tylli ki jaka ki ba dang sahteng ban iapynbeit pud bad ka Assam, bad la bthah ba kin aiti ia ki kaiphod hapoh ka 45 sngi.
Ka jingpynbna bala pynmih da u Chief Secretary Dr Shakil P Ahammed ha ka sngi Ba-ar, kala pynkylla thymmai ia ka jingpynbna kaba la pynmih ha ka 20 tarik Lber 2023.
Kine ki Committee kin shong bishar ia ka Langpih ha West Khasi Hills, Borduar, Nongwah-Mawtamur, Deshdoonreah, Block-II ha Ri-Bhoi bad ka Block-I, Psiar-Khanduli ha West Jaintia Hills.
U Symbud Myntri Rangbah ka Jylla Bah Prestone Tynsong un khlieh ia ka Ri-Bhoi District Committee, ka ban kynthup ia u Myntri Sorkar Bah Sosthenes Sohtun bad MLA ka Nongpoh Bah Mayralborn Syiem, u EM ka KHADC Denzil Raynard Chen bad u Deputy Commissioner ka Ri-Bhoi kum u Member Convenor.
U Myntri bording Bah Metbah Lyngdoh un khmih ia ka West Khasi Hills Committee bad ki dkhot ki kynthup ia u Myntri Sorkar Bah Methodius Dkhar bad ki MLA Bah RL Tongkhar, Remington Gabil Momin, CEM ka KHADC Winston Tony Lyngdoh, MDC Lurshai Kharbani bad ka Deputy Commissioner ka West Khasi Hills kum ka Member Convenor.
Ka West Khasi Hills Committee kan dei kaba khlieh da u Symbud Myntri Rangbah Bah Sniawbhalang Dhar bad ki dkhot ki kynthup ia u Myntri Sorkar Bah Lahkmen Rymbui, MLA Bah Comingone Ymbon bad Nujorki Sungoh, CEM ka JHADC Thombor Shiwat, MDC Aiborlang Shadap bad u Deputy Commissioner ka West Jaintia Hills kum u Member Convenor.
Kat kum ka jingpynbna, kine ki Committee kin iatreilang bad ki Regional Committee ka Assam, ban iapynshisha ia ki kyrteng jong ki Shnong kiba kam da ka Meghalaya na ki record ka Assam.
Kin pynshisha ia ki jinglong ki jaka bad ka jingiajan bad ki shnong, khmih bniah ia ki record halor ka jingdon ki nongshnongshnong bad ki Jaidbynriew ba ki dei, bad ban pynkhreh ia ka “As-Is’ Public Asset Register ia ki jingdon jingem jong baroh artylli ki Jylla.
Kine ki Committee kin hap leit jngoh ia baroh ki shnong bad iakren bad ki nongshongshnong, ki nongmihkhmat ki ADC bad kiwei kiwei ki kynhun ba don bynta, ban tip ia kaei ka jingsngew jong ki briew kiba sah ha kine ki thain.
Kin buh jingthoh ruh ia ka jingjngai bad ka jingbam por na ki shnong sha ki jaka shakri paidbah ba iajan eh lane ki Administrative Unit. Ki Deputy Commissioner jong ki District kin ai ia ki jingkyrshan kiba donkam.
Ki Member Convenor jong kawei pa kawei ka Committee in buh ia ki sngi leit jngoh ia ki shnong ha ryngkat ka jingiasyllok lang bad ki Committee na Assam.
“Ki Committee kin aiti ia la ki kaiphod sha ka Sorkar Meghalaya hapoh ka 45 sngi na ka sngi ba pynmih ia kane ka jingpynbna kaban pynshong nongrim na ki jingjurip ia ki shnong bad ba pynshong nongrim na ki khana pateng, ka jaidbynriew jong ki nongshongshnong, ka jingsngewsuk ki trai shnong ha ka liang ka synshar khadar bad ka jingsngew jong ki briew kiba sah ha kitei ki thain” ong ka jingpynbna.
