Shillong Jylliew 27: Kum shi bynta ban ialeh ban iada ia ka hok jong ki khynnah khamtam ha kaban leit ban ialap ba ym dei ban pyntrei bylla sngi bad ban kiar na ka shongkha khynnah, ka FXB India Suraksha kala pynlong ia ki prokram ki bapher bapher ban pynsngewthuh ia ki paidbah halor katei ka phang kaba ktah ia ka imlang sahlang.
Ban pynurlong ia katei ka jingangnud ban iada ia ki khynnah, ka FXB India Suraksha kala pynlong ia ki prokram da ka jingiatreilang bad Ministry of Women and Child Development, ka CHILDLINE 1098 bad kiwei kiwei ha kaban ai jingshakri ia ka imlang sahlang bad kala pyntreikam ia ka Holistic Rural Development Programme ha Nongpoh, Mawthei, Umkhtieh, Umsawriang bad Umsaiprah jong ka Ri-Bhoi district naduh u snem 2016, ha kaba la ai jingmyntoi ia palat 10,000 ngut ki briew.
Ha ka 23 tarik u Jylliew, ki nongialam jongka FXB India Suraksha ryngkat bad ki heh jongka Tnad Labour, DCPU, District Court bad ki Pulit kila leit ban jurip ia ka Iew Mairang ban khmih bniah ba ym dei ban pyntrei bylla ia ki khynnah rit.
Ka FXBIS da kaba iatreilang bad ka Just Right for Children, dang shen kala sdang pyntreikam ia ka ‘Access to Justice for Children Project’ ha Eastern West Khasi Hills, West Khasi Hills bad Ribhoi district. Kane ka project ka kyrshan ia ka jingialap kaba la tip kum ka “Child Trafficking and Child Marriage Free India Campaign’ kaba la maitphang da ka Ministry of Women & Child Development jong ka Sorkar India.
Ha ka 12 tarik u Jylliew, ka FXB India Suraksha ryngkat ka jingkyrshan ka Tnad Labour, DCPO bad DLSA kala pynlong ia ka jingialang ai jingpynsngewthuh ia ki paitbah kum ka jingrakhe ia ka World Day Against Child Labour, kaba la pynlong ha Mairang Presbyterian Science College halor ka phang “Red card to child labour: Fair play for children, decent work for adults” bad ha kane ka prokram la wan ban iashimbynta lang da ki ophisar sorkar na ki tnad bapher bapher bad kiba la ai ruh ia ka jingiatreilang ban pynkhlain ia ka jingai jingiada ia ki khynnah.
Nalor kane kala sdang pyntreikam ruh ia ka School Development Project, ha kaban pyntei bad ban sam ia ki 49 tylli ki Digital Classrooms ha ki 25 tylli ki skul ha ki 3 tylli ki district jong ka Meghalaya.
Ka FXB India Suraksha kala trei naduh u snem 2007 ban kyntiew bad ban ai jingkyrshan ia ki khynnah, ki longkmie bad ia ki longiing ha sor bad nongkyndong ha kylleng jong ka ri India bad da ka mishon ban iarap ia ki riewshimet ban im donburom bad ka jingioh ka imlang sahlang ia ka hok.
Kala pynleit jingmut ha ki jaidbynriew kiba la shah ktah ha ka jingpang HIV, hynrei katba nang iaid ki por kala pyniar ia ka rukom treikam ka jongka ha kiwei pat ki bynta kiba kongsan. Kala pynleit jingmut ruh ha kaban ailad ban ioh ia ka jingpule kaba biang, ban kyntiew na ka jingduk jingkyrduh bad ia ka jingroi ha ka rukom im, ban kyntiew ia ka koit ka khiah bad ia ka jinglong jingman, ka jingiada bad ka jingshngain.
Ka FXB India Suraksha mynta ka treikam ha ki 14 tylli ki jylla bad ha kawei ka Union Territory bad kala lah ban kynjoh ia ka jingai jingshakri sha palat 500,000 ki nongshong shnong ha ka ri lyngba ki sienjam kiba la shim da kane ka kynhun.
