Shillong, Jylliew 27: U Founder bad Managing Director jong ka Supercare Hospital, u Dr. R. S. Thangkhiew, ula ïoh pdiang ïa ka khusnam ‘Lifetime Achievement Award na ka North-East Liver Foundation Society’ ha ka 6th North-East Medicon 2026, kaba la long ha ka 6 tarik u Jylliew 2026 ha Guwahati, Assam.
Ïa kane ka khusnam la ai ha u Dr Thangkhiew kum ka jingïaroh ïa ki jingnoh synñiang kiba kyrpang bad kiba neh slem jong u ha ka bynta ka jingai jingsumar paidbah, ka jingaiti lut jong u ha ka jingsumar ïa ki nongpang, bad ka jingshakri paidbah jong u kaba la neh da ki phew snem.
Ha ka jingïalam ba shemphang jong u Dr. Thangkhiew, ka Supercare Hospital ka la kylla long kawei na ki jaka sumar kiba pawnam ha ka thaiñ, da kaba ai ïa ki jingsumar kiba la tbit bad kiba thymmai, hynrei ruh ka dang bat skhem ïa ka nongrim jong ka jingsumar ba don jingïadei bad jingïasyllok bad ki nongpang bad ka jingthrang jongu ban poi sha ka jingbha tam ka la noh synñiang shibun ban kyntiew ïa ka kyrdan ka jingsumar paidbah bad ban pynroi ïa ka jingstad ha ka thaiñ.
U Bah Damien Marwein, Chief Operating Officer jong ka Supercare Hospital, u la ong “Kane ka jingithuh ka dei ka por ba sngew sarong ym tang ïa ka Supercare Hospital hynrei ïa ki kynhun jong ki nongtrei jingai jingsumar ha Meghalaya ruh. Ka jingaiti lut jong u Dr. R. S. Thangkhiew ha ka jingsumar ïa ki nongpang, ka rukom sumar kaba hok bad ka jingpynroi ïa ki jingshakri sumar kala ktah bha ïa bun bah ki jingim ha ka thaiñ. Ka jingïohi jngai bad ka jingïalam jongu ka dang bteng ban pynshlur ïa ki nongtrei sumar bad ban pynïaid shakhmat ïa ka thong jong ngi ban ai ïa ka jingsumar kaba bha bad kaba dap da ka jingsngewsynei. Ngi sngewkmen shibun ban ïohi ïa ka jingtrei shitom jong u kaba la ithuh ha kane ka rynsan kaba don burom”.
Ki bor pyniaid bad ki nongtrei jong ka Supercare Hospital ki ai ka jingïaroh kaba khraw ïa u Dr. R. S. Thangkhiew halor kane ka burom kaba u dei hok ban ïoh bad ki pynskhem biang ïa ka jingangnud jong ki ban bteng ïa ka jingïohi jngai jong u ban wanrah ïa ka jingsumar kaba suk ban poi, kaba hok, bad kaba don kyrdan bha na ka bynta ki paidbah ka Meghalaya bad shabar ruh.
La kha ïa u u Dr. R. S. Thangkhiew ha ka 28 tarik u Nailar 1957 ha Shillong bad udei uwei na ki nonglamkhmat ha ka lad jingsumar paidbah kiba thymmai ha Meghalaya bad ka thaiñ Shatei Lammihngi. U dei u alumnus jong ka PGIMER, Chandigarh bad ula wanphai sha Shillong ha ki snem 1980 kum u Doctorate in Medicine (DM) uba nyngkong na ka jaitbynriew Khasi bad u DM Gastroenterology (Ka jingpyntbit ha ka jingsumar ïa ka kpoh) uba nyngkong ha ka thaiñ Shatei Lammihngi.
Haba iohi ïa ka jingdonkam ban don ki jingshakri sumar kiba la kiew ha ka jylla, u Dr. Thangkhiew ula wanrah shibun ki lad bad ki jingthaw thymmai ha ka jingpynïaid sumar. Ha u snem 1988, ula seng ïa ka jingshakri Endoscopy kaba nyngkong ha ka jylla, hadien kata ha u snem 1995 ula wanrah ïa ka Video Endoscopy bad Video Colonoscopy kiba la tbit. Ha u snem 1999, ula leh ïa ka rukom sumar ERCP (Endoscopic Retrograde Cholangiopancreatography) kaba nyngkong ha ka thaiñ shatei lam mihngi, kaba la long kawei na ki mawjam ba kongsan ha ka histori ka jingsumar ha kane ka thaiñ.
Da ka jingïohi jngai ban pynbha ïa ka jingïoh rung sha ka jingsumar kaba bha, ula seng ïa ka Supercare Medical Centre ha Shillong ha u snem 1991 bad kane ka jingïohi jngai kala poi sha ka jingthaw ïa ka Supercare Hospital ha u snem 2005, kaba mynta ka la kylla long kawei na ki jaka sumar kiba hakhmat ha Meghalaya.
Kum ka jingïaroh ïa ki jingnoh synniang jong u ha ka gastroenterology, la thung ïa u kum u President uba nyngkong jong ka Indian Society of Gastroenterology – North-East Chapter ha u snem 2018. Ha ka jingïaid lynti kaba la palat sawphew snem, u Dr. Thangkhiew ula ïoh ïa ka jingshaniah bad ka burom na ki pateng pateng ki nongpang bad u la bynta ban shna ïa ka dur ka dar jong ka jingsumar paidbah ha Meghalaya bad ka thaiñ Shatei Lammihngi.
