Shillong, Jylliew 25: U Myntri ka tnat Animal Husbandry Veterinary Bah Sanbor Shullai ha ka sngi Thohdieng, ula kren shai ba ka Sorkar kan ym pyndam ia ka Open tender ban pyntrei ia ka Veterinary Hospital ha Shillong, wat hapdeng ka jingkyrpad jong ka Meghalaya Contractor Supplier Association, kaba dawa ban pyndam shuwa ia ka.
“Ka Meghalaya Contractor Supplier Association kala aiti ia ka jingkyrpad sha nga, kum u Myntri, ban pyndam noh ia ka tender jong ka hospital ha Upper Shillong” ong u Bah Sanbor.
“Halor kane, ngam lah satia ban ai kano kano ka jingkular ban pyndam ne ym pyndam, namar ia ka open tender lah dep ban pynlait” ula ong haba ban jur ba baroh ki contractor kiba lah ban pyntrei ia ka kam, ki lah ban iathep tender bad ka rai kan shong ha ka tender committee.
“Baroh kito kiba lah ban aplai, kiba lah ban trei, bad kiba lah ban pyndep ia baroh ki kyndon kin ym shah khanglad satia. Mano mano ruh ki lah ban iashimbynta, Ka jingkylli ban pyndam noh ia ka tender kam mih satia” ula ong.
U Bah Sanbor ula iathuh ba ula bthah ia kane ka seng ki contractor ba ki dei ban leit iashimbynta ha ka jingiathep tender.
“Kila wan hangne bad nga la bthah ia ki ba kin iashimbynta. Mynta ka shong ha ka tender committee ban rai iano ban aiti ia ka kam” ula ong.
U Myntri ula pyntip ba iaka Tender la khot mynta la palat shi bnai tam bad ka sngi khatduh kadei 5 tarik Naitung 2026.
Ula pyntip ba la mang iaka Veterinary Hospital haka jinglut kaba ym duna T.60 klur.
Halor ka jingkynnoh ba ka don jingthep Tender daki briew ba ithuh iaki ba don haka bor, u Myntri ula ong “Kam mih kata ka jingkylli, namar lada ngi la don briew lajong, ngim donkam huh ban khot Tender. Kadei ka Open Tender, baroh ki Contractor kiba la ithuh daka Sorkar ki lah ban ïashimbynta lada ki biang lut iaki jingdonkam katkum ki kyndon bala buh hynrei haba kut ka shong pat haka Tender Committee ban peit, ban bishar bad ban rai, iano yn ai iaka kam”.
