Shillong, Jylliew 26: Ki nongshongh shnong jong ka East Khasi Hills kin ym donkam shuh ban leit mih sha ka District Headquarter ban leh ia ka Birth bad Death Registration, da ka jingpynkup bor u Deputy Commissioner ki Block Development Officer ban long kum ki Executive Magistrate na ka bynta katei ka kam.
Ha ka jingpynbna kaba la pynmih hynne ka sngi Thohdieng, u Deputy Commissioner bna pynkup bor hapoh ka Section 13(3) jongka Registration of Births and Deaths Act, 1969, ryngkat bad ka Rule 9(3) jongka Meghalaya Registration of Births and Deaths Rules, 1999.
Ha kane ka hukum la kdew baroh ki BDO ha kylleng ki bynta jong ka district mynta kin lah noh ha kaban khmih ia ka jingrejistar, jingpynbeit, jingpynduh, ka jingpynslem ha ka jingrejistar bad kiwei kiwei ki mat kiba iadei bad ki nongaplai hapoh u pud u sam jong ka jylli treikam ka jongki.
“Ia ki aplikeshon lah ban aiti ha ki Block Development Office ba kin leh ia kaba donkam halor katei ka mat” la ong ha ka hukum.
Kane ka jingbthah, kan treikam noh mardor bad kan iai bteng ban treikam tad haduh ban da pynbna da kumwei pat, kadei da ka jingthmu ban pynthikna ia ka jingkloi ha kaban pyndep ia ki kam ha ka kyrdan jong ka Block.
Ki ophisar kila ong, ba kane ka sienjam kan pynsuk shibun ia ki briew kiba aplai kiba ha ka thain nongkyndong, kaba baroh shi katta ki hap ban wan sha Shillong ban ioh ia ki sertiphiket, ki jingpynbeit ne ka jingslem ha kaban rejistar.
