Shillong, Jylliew 23 : U Myntri Rangbah ka Jylla Conrad K Sangma ha ka sngi Ba-ar, ula bthah ia ki Ophisar ba kin pynkhreh ia ka lynti treikam (roadmap) kaba bniah ban pyniar ia ka jingpyndonkam ia ka renewable energy (bording ba pynmih na ki bor ka mariang) hapoh ka Jylla, da kaba pynleit jingmut ia ka jingpyndait kor solar ha ki tnum iing, battery storage bad kiwei ki lad pynmih bording.
Haba pyniaid ia ka jingialang bishar kam halor ka jingpyntreikam ia ka PM Surya Ghar : Free Electricity ka Sorkar Pdeng ha State Guest House, Taraghar, u Conrad ula ban jur ia ka jingdonkam ban klop lang hajuh ia ka buit pynmih bording na ki bor ka mariang kiba pynwandur kat kum ka jinglong jingman ki jaka ha Meghalaya.
Ka jingialang kala bishar ia ka jingiaid jong kane ka skhim ka Sorkar Pdeng, kaba thmu ban ai ei haduh 300 unit ka bording elekrtik ha ka shibnai sha ki longiing lyngba ki kor solar ba pyndait ha tnum iing, ryngkat ka jingkyrshan song pisa ka Sorkar Pdeng ba kot haduh T.78,000 ia ki nongioh bynta.
Ki Ophisar kila pyntip ia u Myntri Rangbah ba wat hapdeng ka subsidy ka Sorkar Pdeng, ka jingpyndonkam ia ki kor solar ha Meghalaya ka dang iaid suki bha namar ka jingbun ka jinglut haba sdang, kaba mih na ka jinglut ha ka kit ka bah, ka jingjynjar ki jaka bad ka jingduna ki lad ban pyndait ia ki kor solar hapoh ka Jylla.
U Conrad ula shong bishar ia ka jingshem na ka pilot rooftop solar project bad iakren ia ki lad ki lynti ban pynlong ia ka jingpyndait kor solar kaba kham khring da kaba pynduna ia ka jingsiew pat bad pynbun ia ki jingmyntoi jong ki nongpyndonkam. Ula ban jur ruh ia ka jingpyndait lang ia ki battery storage system ban pynjanai ia ka jingioh ia ka bor kaba lah ban shaniah bad pynduna ia ka jingshaniah ia ka bording na ka power grid ha ka por ba jur ka jingdawa.
Ka jingialangkala akren ruh halor ka jingpynrung ia ki kor solar ba pyndait ha tnum iing ha ki jingtei jong ka Sorkar, ki skul bad ki anganwadi centre, haba khot ia ka jingleit pynsngewthuuh ia ki paidbah lyngba ki jaka pule bad ki kynhun ki samla.
Haba kren halor ka jinglong pher ki jaka puta ha Jylla, u Myntri Rangbah ula kyntu ia ki Ophisar ba kin wad ia kiwei pat ki lad pynmih bording kum na ka biomass bad biogas plant, midro-hydel project bad kiwei kiwei, haba pynpaw ba kine ki technology ki lah ban ai ia ka lad pynmih bording kaba neh ha ki jaka kyndong bad nongkyndong.
 kaba bniah ban pyniar ia ka jingpyndonkam ia ka renewable energy (bording ba pynmih na ki bor ka mariang) hapoh ka Jylla, da kaba pynleit jingmut ia ka jingpyndait kor solar ha ki tnum iing, battery storage bad kiwei ki lad pynmih bording.){kind=link}