Guwahati, Jylliew 20: Khatlai ngut ki briew kiba la suba ba ki dei ki nong Bangladesh kila shah kem ha ka por ba pynlong ïa ka jingpynshisha da ki pulit ha Guwahati ha ka sngi Thohdieng, hapdeng ka jingpyrshang kaba dang bteng ban ithuh ïa ki nongshong shnong beaiñ ha katei ka nongbah.
Ia katei ka jingkhynra la pynlong ha ka thain Arya Nagar, ha kaba ki pulit ki la lap ia katei ka kynhun na kawei ka guest house ha ka por ba ju leh ia ki jingpeit bniah bad ki jingpynshisha ia ki kot ki sla.
Katkum ka jingiathuh ki heh ophisar, katei ka kynhun ka kynthup ia ki shynrang, ki kynthei bad katto katne ngut ki khynnah. Hadien ka jingtohkit ba nyngkong, baroh 13 ngut ki briew la rah sha Border Branch jong ka Paltan Bazar Police Station na ka bynta ban pynshisha bad pyndep ïa ki kyndon aiñ.
Ki pulit ki la iathuh ba ki bor pyniaid mynta ki dang eksamin ia ki kot ki sla, ki jingithuh bad ka jingleit jingwan jong ki ban tip ia ka jaitbynriew jong ki bad ban pynthikna kumno ki la poi ha Guwahati.
“Ka jingtohkit jong ngi ka dang ïaid shakhmat.Baroh 13 ngut ki briew la kem bad ka jingtohkit ka dang ïaid shakhmat,” ong uwei u heh pulit.
Kane ka jingshah kem kaba khatduh ka long ha ka por ba ki bor pahara ha kylleng ka Assam ki la pynjur ïa ki jingpynshisha bad ki lad jingpeitngor ban peit bniah ïa ki jingwan rung beaiñ bad ban ithuh ïa ki briew kiba sah ha ka jylla khlem ki kot ki sla kiba biang.
Ki heh ophisar ki la iathuh ba yn sa shim khia shuh shuh katkum ka jingmih na ka jingtohkit kaba dang iaid shakhmat.
