Haduh 11 tylli ki Processing Unit kila treikam ha Meghalaya, palat 55,000 ki nongrep kila myntoi : CM

Shillong, Jylliew 19 : U Myntri Rangbah ka Jylla Conrad K Sangma ha ka sngi Thohdieng, ula shim ia ka karkhana pynmih musla organic (Organic Spice Processing Plant) ha Ri-Bhoi kum ka “sienjam ban wanrah jingkylla” na ka bynta ki nongrep, bad ainam sha ka jingkyrshan ba phra snem sha ki kam ba da thmu na ka bynta ban kyntiew ia ka ioh ka kot ki nongkyndong ha kylleng ka Jylla.

Haba kren ha ka jingialang ha ryngkat ka jingiadonlang ka Myntri Pla Tyngka ka Ri Nirmala Sitharaman, u Conrad ula ai khublei ia ka Myntri namar ka jingkyrshan ia ka roi ka par jong ka thain Shatei Lam Mihngi.

Ula ong ba ka jingpynleit jingmut jong ka Sorkar naduh u snem 2018 kala long eh halor ki kam kiba lah ban leh ban kyntiew ia ki nongrep : ki jingtei kiba kham biang, ka jingpynioh ia ki iew, ki jingai jinghikai, bad ka jingpynmih ia ki mar ba kham heh dor na ki marrep ha ka jaka jong kawei ka scheme kaba mang lut ia baroh.

“Ngi la nang tei ia kaei kaba ki nongrep kila leh bha – ki rukom rep tynrai – ai jingkyrshan song pisa, ka jinghikai bad pyniasoh sha ki iew ia ki kynhun nongrep kiba kut jingmut hok” ula ong.

U Conrad ula pynpaw ba ka Meghalaya kala don mynta haduh 11 tylli ki Processing Unit kiba la treikam bad baroh lang, kila kyrshan ia kumba 55,000 ngut ki nongrep bad ia ka iing ka sem jong ki.

“Kiba rit, ki sienjam ba da pynleit jingmut ki lah ban wanrah ia ki jingkylla kiba heh ha ka kamai jakpoh bad ka ioh ka kot ha ki nongkyndong” ula ong. Ula pynpaw ia ka jingai jingmut ba dang shen jong ka Myntri Pla Tyngka halor ka jingpynpoi mar, ka jingshalan bad ka jingpynmih ia ki mar ba kham heh dor, haba pynpaw ba ka Jylla naduh kata, kala pyrshang ban pynbiang ia ki Cold Storage, ka jingbha ki mar bad ka jingneh slem ki mar ban lah poi sha ki iew kiba heh.

Ula pynpaw ruh ia ka jingnang kiew ka jingiatreilang hapdeng ki Jylla jong ka thain Shatei Lam Mihngi.
“Ka thain mynta ka don ia ka synshar khadar kaba skhem, ki jaka treikam kiba khlain. Hapoh ka jingialam u Myntri Rangbah Duh Narendra Modi, ka thain kala iaid ryngkat ryngkat bad kiwei ki bynta jong ka ri India bad noh synniang sah ka jingkiew shaphrang ka Ri” ong u Conrad.

U Secretary ka Tnad Agriculture Vijay Kumar D, ula ong ba kane ka jingplie ka dei u mawmer na ka bynta ki 3.6 lak ki longiing nongrep jong ka Jylla.
U ong ba kane ka karkhana ha Ri-Bhoi ka lah ban kyntiew ia ka kamai ki nongrep da jan 50% tang ha kawei ka aiom da kaba khate ia ka jingduhnong hadien ba dep ka aiom ot bad ka jingpyniasoh sha ki iew.