Shillong, Jylliew 19 : Ka Myntri Pla Tyngka ka Ri Nirmala Sitharaman ha ka sngi Thohdieng, kala plie paidbah ia ka karkhana pynmih musla kaba hehduh jong ka thain Shatei Lam Mihngi ha Ri-Bhoi District, Meghalaya bad ong b aka lawei jong ka rep ka riang ka leit sha kito kiba pynmih “ym tang ba pynmih bun, hynrei ba kham bha, ba kham khuid, ba kham shngain, ki mar ba lah ban buddien ia ka tynra bad kiba neh”.
Ka Myntri kala plie ia kane ka karkhana ha ka jingiadonlang u Myntri Rangbah ka Jylla Conrad K Sangma bad u Myntri Rangbah ka Sikkim Prem Singh Tamang.
Haba kren sha ki nongrep, ki nongialam shnong bad ki kynrem ki lyndan ha kane ka jingialang, ka Sitharaman kala ong ba ka Meghalaya ka don ia ka jinglong ka mariang ba kham pher ha kane ka juk kaba ki nongthied nongpet ha kylleng ka pyrthei ki iabeh ia ki mar rep kiba bha, kiba neh bad kiba lah ban buddien ia ka tynrai.
Haba pynpaw ia ka jingsngewtynnad ban don ha ka jaka pdeng ba seisoh ka Ri-Bhoi, ka Myntri kala pynpaw ba ki paidbah ka Meghalaya kila pdiang ia ka nongrim ka jingpynneh slem hashuwa ba kan long ka mat ba iakren ha ka pyrthei. Haba kdew ia ka jingstad u Khasi ba ban jur ia ki jingktah na ki kam ba leh hi ki briew, kala pynpaw ba kane ka nongrim ka iahap bha bad ka rep ka riang, ha kaba ki rai halor ka khyndew, ka um bad ka rukom rep la pynshong nongrim na ka jinglah ban kyrda bad jingpynmih.
Ka Myntri kala batai ia kane ka karkhana kum ka jingpynkut ia ka jingpyrshang ba palat shiphew snem jong ka Eastern Ri-Bhoi Organic Farmer Producer Company ban tei ia kane ka karkhana bad ka nuksa ba kumno ki jingkynshew ha ki kam kiba thmu, ka jingiashimbynta ka imlang sahlang bad ka jingkyrshan ba iai neh ka lah ban wanrah ia ka jingmih kaba neh bad kaba kynthup lang ia baroh.
Kane ka karkhana bala kynshew kumba T.32 klur, ka dei kaba la pynwandur ban pynmih ia palat 10,000 metric ton u musla organic, nalor ki jingtei kum ka cold storage, dry storage, washing, drying bad kiwei kiwei. Kane ka karkhana kan tyllait ia ki marrep kum u sying, shynrai, sohmarit bad u sohmenken.
Kane ka karkhana ka dei ka dei kaba nyngkong eh ban ioh ia ka syrnot pynmih musla organic hapoh ka thain Shatei Lam Mihngi bad la ithuh hapoh ka National Programme for Organic Production (NPOP) bad EU Organic Standard, kaba plie lad ia ki iew ban die hapoh ka Ri bad shabar ri ruh kumjuh.
La khmih lynti ba ka karkhana kan ai jingmyntoi ia kumba 5,500 ngut ki nongrep jingthung organic ha kylleng ka Jylla bad ka thain Shatei Lam Mihngi lyngba ka jingmih ia ki mar ba kham rem dor, pynduna ia ki jingduhnong hadien ka aiom ot, bad kiwei kiwei.
