Shillong, Jylliew 18: Ka Myntri ka tnat pla tyngka ka Sorkar Pdeng ka Nirmala Sitharaman kan wan sha Meghalaya ha ka 19 bad 20 tarik Jylliew ban iashim bynta ha ka seminar halor ka “Leveraging Externally Aided Projects in the North-Eastern States” ha Shillong, bad ban plie paidbah bad bishar bniah ia ki projek jong ka jylla.
Ka jingwan jngoh jong ka Nirmala iaka Meghalaya kan sdang naduh ka 19 tarik Jylliew da ka jingplie bad ka jingjurip ia ka karkhana pynmih jingber ba heh tam jong ka North East kaba don ha Bhoirymbong Ri-Bhoi District, kaba la pyniaid da ka Eastern Ri Bhoi Organic Farmer Producer Company.
Hadien kata, haka por 4:30 janmiet ka Myntri Sorkar Pdeng kan ai jingkren ha ka prokram ha U Soso Tham Auditorium ha Shillong ban shimbynta ban sakhi jong ka jingïaid shaphrang jong ki Externally Aided Projects ha Meghalaya bad ban buh ïa u mawnongrim na ka bynta ka projek ba thymmai ba la bei pisa da ka EAP kaba shongdor T.1,200 klur.
Ha ka 20 tarik Jylliew, ka Myntri Sorkar Pdeng kan leit sha West Jaiñtia Hills na ka bynta ka jingïakren bad ki samla pule jong ka Kiang Nangbah Government College ha Jowai ha ka por 10.15 baje mynstep, bud sa ka jingplie ïa ka Khliehtyrshi Primary Health Centre ha ka por 11.30 baje mynstep.
Ka jingwan jngoh bad ka jingiashim bynta haki jingialang kadei naka bynta ban pynpaw ïa ka jingpyndonkam jong ka Meghalaya ïa ka pisa nabar na ka bynta ki jait jingtei kam pynroi, ka rep ka riang ka koit ka khiah, bad ban wad ki lad ki lynti ban pynkhlain ïa ka jingpyntreikam ïa ki EAP ha kylleng ka thaiñ Shatei Lam Mihngi.
