Shillong, Jylliew 18 : Ka Iingkashari Meghalaya High Court kala kdat noh sharud ia ka ejahar bala mudui pyrshah ia u Ulrich Jordan Marlong, haba hukum ba kam don satia ka jingkhang ban pynduh noh ia ka mukotduma hadien ba u nongmudui bad uba mynsaw, kiba dei hi shibahaiing, kila iamynjur ia ka jingiapynbeit.
Iaka hukum la pynmih da ka Iingkashari ba khlieh ka Chief Justice Revati Mohite Dere ha ka sngi Balang (17 Jylliew) hadien ba shong bishar ia ka mukotduma ba mudui da u Mawlong, Dondor Jarain bad George Jarain.
Ka ejahar ha Sadar Police Station kala mih na ka jingjia ba 24 tarik Kyllalyngkot, 2024 ha kaba u Mawlong la kynnoh ba ula tynrah ia u George Jarain da u screwdriver ha ka por ba dang jur bha ka jingiatim ha Iing, kaba lam sha ka jingmong ha ka kti ka mon.
Ia ka mukotduma la register hapoh ka kyndon 118(1) jong ka Bharatiya Nyaya Sanhita namar ka jingpynmynsaw da ki tiar ba mynsaw.
U Dondor Jarain, para jong uba mynsaw bad u nongmudui ha ka mukotduma, ula wna mih lyngba ka video conference ha ryngkat u George Jarain,
Baroh arngut kila iathuh ha Iingkasahri ba kila dep iapynbeit ia kane ka kam bad kila iasoi ia ka soskular, ka copy kaba la wanrah hapoh ka Iingkashari.
Haba shim ba ki dei kiba iadei bahaiing bad ba ka jingmynsaw ka long kaba malu mala, ka Iingkashari ka ong ba kam don kano kano ka jingthut ha kaban shah ia kane ka mudui.
