Pyndep ka Meghalaya ia 2 snem ban pyntreikam ia ki ain bymman ba thymmai | Kyntu u DyCM ban pyrkhat thymmai kumno ban pynkohnguh

Shillong, Jylliew 19 : U Symbud Myntri Rangbah ka tnad kam Pohiing (Police) Bah Prestone Tynsong ha ka sngi Palei ula ong ba ka Meghalaya kala jan pyndep ia arsnem ha ka jingpyntreikam ia ki ain kam bymman ba thymmai, kaba bujli ia ka ain ba 150 snem ka Sorkar Bilat bad ban jur baa ka jingkohnguh ia u paidbah ka dei ban wan na ki jingtip ym ka jingsheptieng.

Haba kren ha ka Nyaya Sanhita Exhibition bala pynlong da ka Tnad Kam Pohiing, u Bah Prestone ula ai khublei ia ka DGP, ka kynhun jong ka bad ka Tnad Pohiing kaba pynlong ia kane ka jingialang,ia kaba u ong ba kala wan slem wat hapdeng ka jingbthah na ka Ministry of Home Affairs (MHA).

“Ka exhibiton kala ailad ia ki khynnah pule bad ki nongiashimbynta ban iohi kumno la pyntreikam ia kine ki ain thymmai bad pyniaid ia ki ha ka kam. Nga la leit jngoh ia katto katne ki stall bad shem ba ki long kiba ai jingtip bha. Ki nongiashim bynta ba dang khynnah jong ngi kin ioh jingmyntoi bha ym tang na kaba pule hynrei na kine ki jingpyni syndon da ki kam” ula ong.

U Bah Prestone ula pynpaw ba ki “3T – Timeline, Technology bad Trust” kum ki nongrim jong kine ki ain ba thymmai bad kyntu ia ki nongiashimbynta ban rah ia ka khubor shala ki jong ki shnong ki thaw.

Haba shim ia ka jingkylla ha ka jinglong ki briew ka dei ka jingeh kaba shisha, ula iasam jingtip ia ki jingshem jong u. “Ha ka por ba nga dang dei u khynnah pule kum ma phi, nga sheptieng bha ia ki Pulit. Nga deng ia ka helmet ym namar ka jingshngain, hynrei ban kiar ia ka jingshah dain kuna. Ngi hap ban pynkylla ia kane ka rukom pyrkhat. Ki SOP bad ki kyndon pyrrkhing ki dei ban sdang bad nga bad sapriang sha ki bahaiing hasem. Ngi bud ia ki ain ym namar ba ka Sorkar ka pyntrei kami a ki hynrei namar ka jingbha jong ngi hi”.

Ula kyntu ia ki Rangbah Shnong bad ki Nongshongshnong ba kin kyntait ia ka rukom pyrkhat ba “kane kam dei ka Sorkar jong nga” haba bynrap “Ka Sorkar ka dei ma nga bad ma phi hi. Ngi wanrah ia kine ki jingpyrrkhing na ka bynta ka bha ka miat jong baroh lang”.

U Bah Prestone ula pynbna ia ka jingpynkylla ba dang shen bad ong ba 12 tylli ki kali mobile forensic kila don mynta ha baroh ki District ka Jylla na ka bynta ka jinglum sakhi kaba sted, ban pynduna ia ka jingshimpor ha ka ban chargesheet kat kum kine ki ain thymmai, bad ka Directorate of Prosecution ba thymmai hapoh ka Tnad Ain ban pynkhuid ia baroh ki mukotduma kiba sahteng.

“Nga sngewskhem ba kane ka prokram kan ai ia ki jingmih kiba don jingmut bad ba neh slem” ula bynrap.

Haba ai jingkren, ka Director General of Police Kong Idashisha Nongrang kala ong ba ki ain kam bymman ba thymmai ki dei kiba donkam naba “ka rukom long ki kam bymman ruh kila kylla bad ki jingeh kiba wan ha man ki jingbishar kam bymman ruh kila kylla”.

Kala ong ba kane ka jingialang ka dei kaba la pynlong da ka jingthmu ban pynbeit ia ki jingsngewthuh bakla. “Ka exhibition ka long ban pyndap ia ki jingdua ha ka jingsngewthuh u paidbah shaphang kine ki ain ba thymmai. Kane ka dei ka kam ka ban shim katto katne por” ong ka kong Nongrang.

Kane ka exhibition ka dei shibynta na ki jingpynsngewthuh ia u paidbah halor ka jingpyntreikam ia ka Bharatiya Nyaya Sanhita, Nagarik Suraksha Sanhita, bad Sakshya Adhiniyam hapoh ka Jylla naduh ka 1 tarik Naitung, 2024.