Shillong, Jylliew 18: Ka Meghalaya kala tyrwa ia ka New Shillong kum ka jaka jngohkai da ka jingkynshew T.450 Klur ban tei ia ka Monolith Tower Complex kaba jrong 123 mitar ha ka jaka pdeng jong ka Master Plan kaba la pyllait ha ka sngi Baar.
Ka Tnad Tourism kala pynlong ia ka State-Level Consultative Workshop on ‘Developing Global Standard Tourist Destinations’ ha State Guest House, Taraghar.
Kane ka workshop kala wanrah lang ia ki ophisar, kiba donbynta lang ha ka kam, ki pyniaid ia ki kam kiba donbynta ha ka kam jngohkai ban pynwan ia ka lynti iaid jong ka jylla sha ka kam jngohkai kaba don ia ka kyrdan bad kaban iai neh.
U Myntri ka tnad Tourism u Timothy D Shira ula ong, ba kane ka Plan ka long kum ka jingkylla kaba khraw ia ka jinglong jingman ka kam jngohkai ha ka jylla Meghalaya.
Ula pynbna ia ka Destination Management Organisation kaba kyrpang kaban khmih bniah ia ka jingdon ia ki kyrdan ha ka kam ba pyntrei, ka jingdon ia ka jingiatreilang hapdeng ki tnad sorkar bad tang kawei ka bynta kaban don ia ka jingkitkhlieh.
Haba banjur ia ka jingpynneh pynsah, ula ong “Ka kam jngohkai kam dei ban wan da kaba ktah pat ia ka mariang ne ia ka jinglong tynrai jong ka kolshor, hynrei kadei ban pynkhlain lang ia kitei baroh ar”.
Katei ka jingtyrwa ia ka jinglong jingman ha ka New Shillong kan dei kaba la lamkhmat da ka Monolith Tower ryngkat bad ka Skywalk, ban long ka Baar hapoh ka ri India ban don ia ka jingtei kaba jrong bha hadien jong u Statue of Unity ha Gujarat.
Kane ka complex kan kynthup ia ka jingdon ia ki Gallery kiba bun jait, ki jaka bam, ki jaka dih sha bad ki dukan die ia ki tiar pynsah jingkynmaw.
Ha kane ka Plan ka kynthup ruh ia ka Public Park, Amusement Park, Meghalayan Theme Park ban pyninam ia ka kolshor bad ia ka kam ialehkai, ka Resort kaba remdor bad Hotel, jaka pynlong ia ki tamasa, ka Convention Centre bad ka jingtei ia ka Football Stadium.
Ka Commissioner & Secretary ka Kong Rosetta Mary Kurbah kala ong, ba katei ka thong ka long ban iaid palat ia ka jingdon ka jylla mynta ia palat 18 lak ngut ki nongwankai da kaba khring da ki nongjngohkai na kylleng ki ri bad ban kyntiew ia ka jingshem bad ka jingsngewtynnad ha ka por ba ki wan sahkai.
Kala kyntu ia kiba donbynta lang ha ka kam bad ia ki tnad ban noh synniang ia ki jingai jingmut bad banjur ia ka jingdonkam ia ki jingtei kiba don ia ki kyrdan, ki lad pyniasoh, ka jingioh ia ka umbam, bording bad ka jingpynwandur ha kaba iadei bad ka jingkhapngiah bad ia ki jingpynitynnad da ka kolshor tynrai ha ka rukom pdiang sngewbha.
U Myntri ka Sorkar Pdeng uba khmih ia ka kam jngohkai u Gajendra Singh Shekhawat ha ka jingwan jngoh dang shen ia ka Umiam bad New Shillong, ha ryngkat bad ka jingtynruh ka Sorkar Pdeng ban don ia ki jaka kiba don ia ka kyrdan ha ka pyrthei hapoh jong ka jingiohi jngai jong u Myntri Rangbahduh ka ri u Narendra Modi.
U Myntri Rangbah ka jylla u Conrad K Sangma u don ia ka jingiohi jngai ban buh ia ka Meghalaya ha ka kyrdan kaba kongsan tam ha ka shlem jong ka jaka jngohkai kadei kaba la pynpaw bha.
Ha ka jingiatai la iakren ruh halor ka lynti iaid ne ka Roadmap jong ka Umiam ban pynkylla sha ka jaka jngohkai kaba don kyrdan ha ka pyrthei, da kaba pynleit jingmut ha ki jingtei, ka jingiada ia ka mariang bad ka jingbit jingbiang ha ki lad pyniasoh.
Ka workshop kala kut da ka jingiatai da ka jingthmu ban tei ia ka jingiadei paralok bad ban kyntiew ia ka jingwan tuid ki nongjngohkai bad ia ki lad ban kamai kajih.
