Shillong, Jylliew 17 : Ka Iingkashari Meghalaya High Court ha ka sngi Balang kala pynpaw ia ka jingsngewkhia halor ka jing pynslem da ka Directorate of General of Civil Aviation (DGCA) ban mynjur ia ki kot ki sla jong ka Safety Assessment na ka bynta ka project ban pynheh ia ka runway ka Shillong Airport, haba maham ba kane ka lah ban lam sha ka jingkiew dor ba hap pynlut da ki nongsiew khajna.
Haba shong bisahr ia ka PIL halor kane ka kam, ka Division Bench ka Chief Justice Revati Mohite Dere bad Justice W Diengdoh kala pynpaw ba ia ka Environmental Clearance na ka bynta ka jingpynheh ia ka runway lah dep ban ioh na ka Ministry of Environmen, Forest & Climate Change ha ka 28 tarik Lber, 2028.
Ia ka work order na ka bynta ka jingpynheh ia ka runway, terminal building, apron bad kiwei ki kam, lah dep ban aiti sha ka M/s KCC Buildon Pvt Ltd ha ka 1 tarik Iaiong 2026, bad la aipor 18 bnai ban pyndep ia ka kam, kynthup 3 bnai namar u slap.
Kat kum ka kaiphod jong ki kam bala iaid kiba la aiti da ka Airport Authority of India ha ka 22 tarik Iaiong, 2026, ia ki kot ki sla jong ka safety assessement lah dep ban pynkhreh bad phah sha ka AAI, CHQ ba kin mynjur hashuwa ban phah sha ka DGCA.
U Deputy Solicitor General of India Dr N Mozika ula pyntip sha Iingkashari ba haduh mynta um pat ioh ia kano kano ka jingbthah na ka DGCA halor ka kaiphod ba iadei bad ka jingbishar ia ka jingshngain.
U Advocate General A Kumar ruh ula pyntip ba ka Sorkar Jylla kala dep ban aiti ia ka jaka sha ki bor shipai ban bujli ia ka jaka ba donkam na ka bynta ban pynheh ia ka runway.
Ka Iingkashari ka sngew ba la jan shibnai tam ka por kala iaid naduh ba aiti ia ka work order bad ka jingpynslem ka DGCA ban aiti ia ka kaiphod kan nang pynslem shuh shuh ia ka project bad wanrah ia ka jingkiew dor ha ka jinglut.
Ka Iingkashari kala bthah ia u DSGI ban pyntip ia kane ha ka sngi ba bud la ka DGCA kala aiti ne em ia ka kaiphod bad lada kam pat ai, ban shim ia ki sienjam ha kaban pynkloi noh wut wut ia ki kam khnang ba ia kane ka project ynlah ban pyndep hapoh ka 18 bnai kumba la aipor.
Ia kane ka mukotduma la buh ban shong bishar biang ha ka 30 tarik u Jylliew, 2026.
 ban mynjur ia ki kot ki sla jong ka Safety Assessment na ka bynta ka project ban pynheh ia ka runway ka Shillong Airport, haba maham ba kane ka lah ban lam sha ka jingkiew dor ba hap pynlut da ki nongsiew khajna.){kind=link}