Shillong Jylliew 17: Namar ka jingsdang tor ki paia bad ka jingbym skhem ki mawnongrim jong ka District Library Jowai, ka Sorkar kala rai ban pynpra noh ia kane ka jingtei ka barim bad kan tei thymmai noh da kawei.
Ia kane la pynpaw da u Myntri ka tnad Arts and Culture Bah Sanbor Shullai ha ka sngi Balang, hadien ka jingwan jurip ia ka District Library-cum-Auditorium kaba don ha ka shnong Mynthong, West Jaintia Hills, ha ka jingdonlang u Myntri ka koit ka khiah u Bah Wailadmiki Shylla, ki heh ophisar jong ka District Library, ki nongialam shnong bad ki nongialam ka Jaintia Students Union.
“Hadien ka jingjurip ia kane ka jaka bad u MLA ka thaiñ, ngi lah ia khmih bniah bad katkum ka kaiphod na u Librarian Incharge bad ki ophisar, imat ka jingtei ia ki mawnongrim mynshwa kam long kaba biang. Ngi lah ia rai ba kidei ban phah mardor noh ia ka kaiphod khnang ba na ka liang jong ka Engineering Wing kaba dei khmih, la kadei da ka MGCC ne Tourism ruh ngin sa ia peit. Ia kane ngin hap ban pynpra noh namar bad dei ban shna noh da ka projek kaba thymmai” ong u Bah Sanbor.
Ula ong, ba katkum ka building bye-law ka long G+5 hynrei kan shong ha kiban ai ia ka kaiphod bad ba kin pynkhreh ia ka DPR la kadei G+3 ruh kan long kaba biang bha. Ia ka bynta kaba shapoh yn pynkylla kum ka jaka pynieng kali ia ki paitbah bad shajrong yn sa don ki Hall bad Auditorium bad kiwei kiwei.
U Bah Wailadmiki ula ong, “Kane ka Hall kadei kaba lah rim bha bad ka bym iahap shuh bad kane ka juk kaba mynta, wat ki jingtei ruh kim long kiba skhem than shuh, kumta da ka jingsngewkhia ka por kala dei ia ngi ba ngin ioh noh da ka District Auditorium kaba biang bad kaba katkum kane ka juk kaba mynta”.
“Kaei kaba kham long kyrpang ha Jowai, ka long ba haduh mynta ki dang don ki jingak drama bad bunsien haba ki leh drama ki jaka ki dap da ki nongpeitkai bad bunsien la hap ban shu pynkhalai nusib mano ban ioh ban shong peitkai bad mano kiban ym ioh. Nga sngew haba ka sorkar ka lah don ia kane ka Hall ngi donkam ban pynshna bha khnang ba kan lah ban iarap ha baroh ki liang bad ha baroh ki prokram, namar ka jingak drama ka lah long kum kawei na ki riti dustur naduh ki por kiba rim abd ngi kwah ban pynneh pynsah ia ka” la ong u Bah Waialdmiki.
