Shillong, Jylliew 17: Phra snem ba dep plie, ka Mihmyntdu Amphitheatre ha Salini Colony kala shu khang khyrdep bad nang jot, kaba la pynlong ia ka Jaintia Students’ Union (JSU) ban dawa na ka sorkar jylla ba kadei ban pynkhie im biang ia kane ka jaka.
Ha ka dorkhas kaba la aiti ha u Myntri ka Arts and Culture u Bah Sanbor Shullai hynne ka sngi Balang, ka JSU Jowai Circle kala ong, ba katei ka jingtei kaba ym shim la pyndonkam lah slem bha kala long tang ka jingpynsep ei ia ka pisa u paitbah bad ka jingbuh jingma ia ki samla.
Ka Union kala ong, ba ka jingbteng ban leit jurip ia katei ka jaka, ka pyni ba kane ka Amphitheatre kala kylla long ka jaka ban ia dih duma, jingdih pynbuaid bad jingpyndonkam ia u droks ha ka jaka ban pynlong ia ka jaka pdeng jong ka kolshor kaba dei ka jingthmu jong katei ka jaka.
Ha ka jingjurip kaba lah dep jong u Myntri Sorkar ryngkat bad ki dkhot ka JSU bad Rangbah Shnong ka Mihmyntdu, la shem ba ki bynta jong katei ka jingtei kila sdang kem pyut, ki jingkhang iit ki lah pait, ki jingkhang ki lah julor, ka jingbym biang ka jingleh ia ka Wiring bad ka jingshah ieh beiñ.
Ka JSU kala kynnoh ba kane ka pyni ia ka jingbym ler ka rukom sumar ia ki jingtei jong ki paitbah bad kala pynduh lad ia ki samla pule ka Jowai bad ia ki nongshong shnong ia ka jaka ha kaba iadei bad ka jingpyni ia ki sap ki phong tynrai bad ki prokram jong ki shnong ki thaw.
Ka seng kala kyntu ia ka tnad ba kadei ban don ka jingpynkit khlieh halor katei ka jingpynslem, ban sdang maramot mardor bad ban peitngor bniah na ka bynta ki projek kiban sa wan.
Ha ka dorkhas la pynpaw “Ki paitbah ka Jowai ki dei hok ban ioh ia ka jaka kaba iadei bad ka kolshor kaban pyninam ia ka jingleh naduh hyndai hynthai bad ia ki jingangnud” bad kala kyntu ba dei ban shim mardor ia ki sienjam khnang ban ioh ia ka jingshaniah na ki paitbah.
Ka JSU kala aiti ruh ia ki dur ki dar ban pyni ia ka jinglong jingman kaba mynta jong katei ka Amphitheatre.
 ban dawa na ka sorkar jylla ba kadei ban pynkhie im biang ia kane ka jaka.){kind=link}