Shillong, Jylliew 16: Ka Sorkar Meghalaya ka la mynjur ban thaw da ka Committee ryngkat bad u Deputy Commissioner (DC) ka East Jaintia Hills lem bad ka Jaintia Coal Mines and Stone Quarries Welfare Association (JCOMSWA) ban shna ia ka Small Scale Mining Policy, hadien ka jingiai bteng u President ka JCOMSWA ban iakhih daka ba shah thngan.
U Information Secretary ka JCOMSWA Bah Overcome Dkhar u la iathuh ba ia kane ka rai la shim haka jingialang bala pyniaid da u Chief Secretary ka Jylla.
Kat kum ka jingong jong u, kane ka Committee kan don bynta ban shna (draft) iaka Policy na ka bynta ki nongtih dewiong kiba don par dewiong ba rit hapoh ka District.
Ka Sorkar ka la mynjur ruh ban pynsangeh shipor ïa ka jingwan poi u dewïong na shabar ka Jylla jylla tad haduh ba u Justice (Retd) BP Katakey un wan jurip shaka thain ha ka 29 tarik Jylliew 2026.
Ki ophisar ki la pynshai shuh ba ki briew kiba shah ktah naka jingshah khang tih dewiong ki lah ban ïoh ïa ki jingmyntoi lyngba ka skhim Meghalaya Environment Protection and Restoration Fund (MEPRF), kaba la pyniaid lyngba ka ophis DC East Jaiñtia Hills.
Nalor kata ka Sorkar ka la kular ban ïakren bad Jaintia Hills Autonomous District Council ban thaw ia ka aiñ ka ban ïada ïa ka hok jong ki trai jaka.
Wat hapdeng ki jingkular, ka JCOMSWA ka la ong ba kam pat hun 100 naka 100, ia kaei kaba la mih naka jingialang bad kala pyntip ba kan bteng ïa ka jingshah thngan haduh da ban jurip u Justice Katakey.
U Bah Overcome u la pynpaw ba u President jong ka Association u dang shah sumar ha hospital bad ba ka jingïakhih kan dang ïai bteng haduh ban da ioh jingshai halor ka jingshah biang ïa ki rit ki ria ban tih dewïong kumba mynshuwa.
Halor ka jingtih dewiong daka juk stad mynta (Scientific Mining), u Bah Overcome u la ong ba ka Association kam pdiang ia ka rukom tih dewiong katkum ka juk saian namar ka kyndon ba hap don jaka ym duna 100 hectare daka ba ong ba kane ka rukom kam iahap namar ki rit ki ria kim kor bor ban tih dewiong katkum ka juk saian namar ka don bun ka jinglut ban iaka jingiohnong.
Ka jingiakhih daka ba shah thngan ha East Jaiñtia Hills ka la sdang halor ki jingdawa ban sdang biang ïa ki kam tih dewïong bad ban don daka Policy na ka bynta ki nongtih dewïong kiba rit kiba shah ktah na ka jingkhang iaka rukom tih dewïong thliew khnai (Rat-hole Mining).
