Shillong, Jylliew 17 : Ka Khasi Hills Autonomous District Council (KHADC) ha ka sngi Balang kala maham ba ki Khasi kiba pynkhein ia ka Lineage Act ki buh jingma ialade ban duh noh ia ka jingithuh kum ki jaidbynriew Khasi.
Ia kane la pyntip da ka ka Executive Member ba khmih ia ka Legal Affairs Kong Deity H Majaw haba jubab ia ka jingkylli bala wanrah da ka MDC ka NPP Kong Grace Mary Kharpuri bad Nongialam ka Liang Pyrshah Bah Titosstarwell Chyne.
Kala ong “Ki briew kiba pynkhein ia ki kyndon jong ka Khasi Lineage Act ki ieng ban shah pynduh noh ia ka jingithuh kum ki Jaidbynriew Khasi”.
Ka kong Grace kala kylli halor ki sienjam bala shim pyrshah ia kito ki bym shim jait na ka Kmie hapoh ka Khasi Hills Autonomous District Council (Lineage) Act, 1997 kumba la pynkylla, katba u Bah Titos ula pan jingshai la kane ka Act ka pynkhlain ia ka dustur ban shim ia ka Jait Kmie.
Ka Kong Deiti kala ong ba ka Act, pule lang bad ka Khasi Hills Autonomous District (Khasi Social Custom of Lineage) Act, 2007, kala kren shai ba ka kyndon 10 ka pynshitom ia kiba pynkhein.
“Kito kiba pynkhein ia ka Act kin shah pynduh noh ia ka jingithuh kum ki Khasi. Kito kiba kyntait ialade ba ki dei ki Khasi kin shah weng noh na ka jingithuh kum ki Khasi” kala pyntip hapoh ka Iingdorbar.
Ka EM kala bynrap ba lada ki Kmie Kpa ki dei ki Khasi, ki Khun ruh ki dei ban long ki Khasi bad pynshem “Hooid” halor ka jingkylli la ka Act ka pynkhlain ia ka dustur ban shim ia ka Jait Kmie.
