Shillong : U Advisor jong u Myntri Rangbah ka jylla ba dei ruh u MLA/MDC ka Nongkrem Bah Lambor Malngiang u la ong ba ki paidbah kim dei satia ban sheptieng ban shim ram na ka bynta ban pynheh ia ka rep ka riang jong ki.
Ia kane u Bah Lambor u la pynpaw haba kren kum u Kongsan ha ka jingialang sam paidbah ia ka song kyrshan pisa ba 23.50 lak tyngka sha ki 30 tylli ki kynhun nongrep ne Producers Group kiba hap ha Mylliem C&RD Block lyngba ka skim FOCUS kaba long ha MAMTEI, Upper Shillong, na ka bynta ba kin pynheh ia ka rep ka riang jong ki.
Da kaba iaroh ia ka jingtrei shitom jong ki nongrep, u Bah Lambor u la ong ruh ba donkam ban pynshai paidbah ia ki skim bapher bapher kiba dei kyrpang na bynta ki nongrep khnang ba kin lah ban kyntiew shuh shuh ia ka kam rep.
Nalorkata, u banjur ruh ban pynkhlain shuh shuh ia ki kynhun jong ki nongrep ha kylleng ki bynta jong ka jylla bad kdew ruh halor ka jingdonkam ban don noh ki jaka sain (food processing) ia ki mar rep khnang ba ki nongrep kin kham ioh bun ki jingmyntoi bad ruh kan kham plie bun ki lad ai kam aijam ia ki samla.
U Kongsan u la pyntip ruh ba ka jingthmu ban don noh da ka kor kyrpang ban buh ia ki mar rep lane kata ka cold storage ha Nongkrem mynta ka la iaid shakhmat.
Ia ki song pisa ba la ai ha ka dur jong ki cheque la sam paidbah da u Kongsan ryngkat u BDO ka Mylliem Block, Bah PT Passah. Hadien kane ka la don ruh ka jingiasyllok hapdeng ki nongrep bad ki ophisdar halor kiba bun ki phang kiba iadei bad ka rep ka riang nalor kiwei kiwei.
