Shillong, Jylliew 14 : Arngut ki samla kila dkhat jubor iala ka jingim da kaba sdien ha u tyllai phasi ha kawei ka sem ap bos kaba don ha ka kyntoit Lumsohphoh, Nongthymmai-markhap ka surok Shillong-Jowai.
Ia kane ka kam la lap ha ka step sngi U Blei bad kine ki arngut ki kyrteng ka Pronome Hajong ba 22 snem na Balat bad u Semnato Hajong ba 21 snem na Ranikor, South West Khasi Hills.
U Superintendent of Police bah Vivek Syiem u iathuh ba ki Pulit kila ioh ia ka jingtip ha ka por 7 baje mynstep ba lap ia uwei u briew bad kawei ka briew kiba sdien phasi ha ka sem ap bos ha ka thain Lumsohphoh, Nongthymmai.
Ia ki met jong kine la pynkynriah noh sha NEIGRIHMS ban pyndep ia ka post mortem.
Kat kum ka jingong u SP, ka jingtohkit ka kdew sha ka jingdkhat jubor hi iala ka jingim hynrei ia ka daw ba shisha halor ka jingiap ynsa lah ban pynthikna da ka kaiphod post mortem.
Ia kane ka case la register ha Laitumkhrah Police Station.
