Guwahati, Jylliew 13: Ka kynhun Myntri ka sorkar Assam ha ka sngi Saitjain ka la mynjur ban khang ia ka jingpynrung kyrteng Aadhaar thymmai na ka bynta ki briew kiba la palat ia ka 18 snem ka rta, ha kajuh ka por ka la pynlait ruh ia ka jingpyntreikam ia ka prokram ai kam ai jam ha nongkyndong kaba 2,000 klur tyngka, kaba thmu ban pynmih ia ki kam ba ioh da ka bainong ha kylleng ka jylla.
Ïa kine ki rai la shim ha ka jingïalang ka kynhun Myntri ba la pynïaid da u Myntri Rangbah ka Jylla Himanta Biswa Sarma ha Lok Sewa Bhawan ha Dispur.
Ka kynhun Myntri ka la rai ba yn ym shah ban pynrung kyrteng Aadhaar thymmai ia ki briew kiba la palat ia ka 18 snem ka rta ha Assam. Hynrei la pyllait ia ki briew Divyang bad ki dkhot jong ki Scheduled Caste, ki Scheduled Tribe bad ki jaitbynriew kiba rep slasha. Na ka bynta ki nongaplai SC, ST bad ki kper slasha, ka jingpyllait kan dang treikam haduh ka 31 tarik u Lber, 2027. Ka jingkhang kan ym treikam ïa ki briew shimet kiba hapoh 18 snem ka rta.
Ka kynhun myntri ka la mynjur ruh ïa ka rukom pyntreikam na ka bynta ka Viksit Bharat Guarantee na ka bynta ka Rozgar bad Ajeevika Mission (Gramin), ka ban treikam naduh ka 1 tarik u Naitung.Da ka jingkyrshan da ka mang tyngka kaba ₹2,000 klur, kane ka skhim kan ai 125 sngi ka jingtrei ba la siew beit katba dang pynleit jingmut ha kaba thaw ïa ki wage employment kiba neh ha ka imlang sahlang.
Ha kawei pat ka jingthmu pynroi sor kaba heh, ka sorkar jylla ka la mynjur ban thaw ia ka Guwahati Satellite Cities Development Authority (GSCDA).Kane ka bor ba thymmai kan kitkhlieh ban shna plan, ban bei tyngka bad ban pynroi ia ki satellite township ha kylleng ka Guwahati hapoh ka jingpeit jong ka Guwahati Metropolitan Development Authority (GMDA).
Shuh shuh ka Kynhun Myntri ka la rai ba ki ophisar jong ka All India Services, kynthup ïa ki ophisar IAS, mynta kin donkam ïa ka jingmynjur jong ka Kynhun Myntri shwa ban ïoh ïa ki No Objection Certificates (NOCs) na ka bynta ka deputation central lane inter-state.
Ka sorkar jylla ka la pynbna ruh ba ka dorbar ban wan jong ka iing dorbar thawain ka jylla Assam kan sdang ha ka 6 tarik Naitung, ha kaba la khmih lynti ba ka sorkar kan wanrah ia ka mang tyngka ba pura jong ka jylla.
