Guwahati, Jylliew 12: Ki Myntri Rangbah jong baroh ki 8 tylli ki jylla ka thaiñ Shatei Lam Mihngi ha ka sngi Thohdieng ki la pynsngew ïa ki jingdonkam jong ki kam pynroi ba kyrpang kiba donkam hakhmat eh jong ka thaiñ, ka jingpynbunïa ki jingtei, ka jingkyntiew ïa ki kam jngohkai pyrthei bad ka jingpynjynsur ïa ki polisi ha ka jingialang jong ka NITI Aayog.
Ka jingialang kaba la pyniaid da u Vice Chairman ka NITI Aayog u Ashok Lahiri, kala lum lang ia ki Myntri Rangbah jong ka jylla Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura, ha ryngkat ki Chief Secretary bad ki heh ophisar, ban iakren ia ki jingeh ha ka roi ka par bad ki buit treikam ba thymmai.
U Myntri Rangbah ka Arunachal Pradesh, u Pema Khandu, u la ong ba ka thain shatei lammihngi kala kylla long kum ka jaka pynroi kaba kongsan bad u la pynpaw ia ka jinglah jong ka jylla ban pynmih bording na um. U la pyni ruh ia ki jingtreikam ka Sorkar kum ka Sarkar Aapke Dwar, Seva Aapke Dwar bad ka Cabinet Aapke Dwar kaba thmu ban kyntiew ia ka jingai jingshakri bad ka jingpynbeit ia ki jingeh.
U Myntri Rangbah ka Assam u Himanta Biswa Sarma u la ban jur ia ka jingdonkam ban don ka roi ka par kaba iaryngkat ban iada na ka jingbym iahap ha ki thain. U la kdew ia ka jingiateh ba dang shen hapdeng ka Centre, Assam bad Nagaland na ka bynta ban tih umphniang bad gas ha ki jaka ba don jingiakajia kum ka nuksa jong ka jingiatreilang ha ka roi ka par ne ka model of cooperative development. U Sarma u la ong ruh ba ka Assam ka la long kum ka jylla kaba kiew stet tam ha ka ri bad u la khot ban kham pyrkhat bha ia ki jingdonkam ha ka roi ka par ha ki thain.
U Myntri Rangbah ka Meghalaya u Conrad K. Sangma u la ong ba ka jingkiew jong ka ioh ka kot ka dei ban wanrah ia ki jingkiew kiba lah ban iohi ha ka roi ka par jong u briew. Haba pyni ia ka Transformation Journey 2032 ka Jylla, u la pynpaw ia ka bynta jong ki projek ba ioh jingiarap nabar ha kaba pynsted ia ka roi ka par bad khot ia ka jingiatreilang kaba khlain hapdeng ki jylla ka thain shatei lammihngi ha ka khaii pateng, ka jingshalan mar shabar ri bad ka jingpynneh pynsah ia ka mariang.
U Myntri Rangbah ka Mizoram u Lalduhoma u la pynpaw ïa ka jingroi jong ka jylla ha ka kam jngohkai pyrthei bad pan jingkyrshan na ka bynta ka Mizoram Ginger Mission. U la kyrshan ruh ia ka jinglong kaba kham jem ha ki skhim ba la kyrshan da ka sorkar pdeng ban weng ia ki jingeh ha ki jylla ba shatei lam mihngi.
U Myntri Rangbah ka Nagaland u Neiphiu Rio u la pynbor ban bteng ïa ka jingkyrshan hapoh ka 15th Finance Commission bad pynpaw ïa ki lad ki lynti ha ki jingtei, ka rep ka riang, ka jingwad umphniang bad gas, bad ka jingshalan shabar ri, kynthup ïa u coffee Nagaland.
U Myntri Rangbah ka Manipur u Y. Khemchand Singh u la pynleit jingmut ha ki jingpyrshang ban pynbha bad pynkynriah jaka ha ka jylla ba la shah ktah ha ka jingïa umsnam, da kaba ban jur ïa ka jingdonkam ban buddien bha ïa ki projek shna thymmai bad shna ïing.
U Myntri Rangbah ka Sikkim u Prem Singh Tamang u la khot ïa ka jingpynbha ïa ka jingpynïadei bad ki kad liengsuiñ, ka jingpynkhlain ïa ka digital infrastructure bad ka jingbteng ïa ka North East Industrial Development Scheme (NEIDS) ban kyntiew ïa ka jingbei tyngka bad ka jingïoh kam ïoh jam.
U Myntri Rangbah ka Tripura, u Manik Saha u la pynpaw ïa ki jingeh jong ka jylla kiba ïadei bad u pud u sam bad u la pan jingkyrshan kaba kham heh na ka bynta ka jingïadei, ki jingtei ha ka khaii pateng, ka jingpynroi ïa ki sap bad ki bynta kiba ïadei bad ka jingshalan mar shabar ri kum u siej, u rubber, ki jain, ki dawai bad ka kam jngohkai pyrthei.
Ki jingiakren ki la ktah ia ki bynta bapher bapher, kynthup ia ka rep ka riang, ka koit ka khiah, ka pule puthi, ka ioh ka kot, ka kam jngohkai pyrthei, ka jingpynroi ia ki sap bad ki jingtei, ha kaba ki jylla ki iasam ia ki jingthmu kiba jop bad ki jingpynwandur ia ki polisi.
Haba pynkut ia ka jingialang, u dkhot jong ka NITI Aayog u Joram Aniya u la ong ba ka jaka pule kan bteng ban iatreilang bad ki central ministries bad ki departments ban weng ia ki jingeh ba la wanrah da ki jylla ka thain shatei lammihngi bad ban kyrshan ia ki jingthmu pynroi jong ka thain.
