Shillong Jylliew 12: Ka Sorkar Meghalaya ka lah jan dep artad ban pyndep ia ka jingbishar bniah halor ka jingshakri jong ka kali 108 EMRI, hynrei ia ka rai ban thungkam pura ia ki nongtrei ka dang sahkut ha suin namar ka jingktah ia ka pla tyngka, ong u Myntri ka Koit ka Khiah Bah Wailadmiki Shylla ha ka sngi Thohdieng.
Haba kren bad ki nongthoh khubor, u Bah Shylla ula iathuh ba ka jingkhmih bniah bala hukum ban pynlong na ka bynta ban peit ia ka rukom ai jingshakri bad ka jingmyntoi ki nongtrei kala poi artad sha ki bynta kaba kut.
“Ngi lah don ha ka bynta ka ban sa pyndep noh. Kumba nga lah kdew hashwa, ngi lah phah ban khmih bniah ia kane ka kam namar ngi kwah ban pynthikna ha kaban iada ia ka bha ka miat jong ki nongtrei ha ka rukom kaba biang bha” ula ong.
Shisien ba ngi lah ioh ia ka kaiphod, ka sorkar ka don ia ka jingthmu ban shong pyrkhat bad ka tnad ka koit ka khiah bad ki nongtrei ka 108 ban pyrkhat ia kaei kaban leh nangne shakhmat.
“Shen ngin sa lum ia ka jingialang bad ka tnad bad ki nongtrei jong ka 108 ban shim ia ka rai” la ong u Myntri.
Ki nongtrei ki lah ai bun tylli ki dorkhas kiba la dawa ban thungkam pura noh ia ki.
Katkum ka jingong u Bah Shylla, ka sorkar kala shimkhia ia kiba bun ki jingsngewkhia hynrei ban thungkam pura kadei kaba ym pat lah ban pynbeit satia.
“Ngi lah ioh pdiang ia ki dorkhas na ka por sha ka por. Kumba 50-60 percent na ka jingsngewkhia ka jongki kadei kaba ka sorkar kala shimkhia lait noh tang ka jingthungkam pura. Kane kadei ka mat kaba heh, ha kaba ia ka rai yn sa shim” ula pynpaw.
U Myntri ula ong, ba ka sorkar ka dang peit ia baroh ki lad kaban iahap bad ka bha ka miat jong ki nongtrei bad kumjuh ruh ha kaba iadei bad ka jingkitkhlieh ha kaba iadei bad ka pisa ka tyngka.
“Ngi dang pyrshang ban trei bad wad ia ki lad kaban yn ktah palat ia ka pisa jong ka sorkar, ha ryngkat bad ka buh ha ka jingmut jingpyrkhat na ka bynta ka bha ka miat jongki nongtrei” la ong u Bah Shylla.
“Ka jingai jingshakri kala iaid shakhmat bad la shimkhia ia ka bynta kaba iadei bad ki paitbah. Hynrei ka jingshim ia ka rai kaba khatduh, kam pat don kano kano ka jingshai halor ka jingbteng. Dei halor kane ba ka sorkar kala pynsangeh noh shwa ia ka jingpyniar mynta” ula ong.
U Bah Shylla, ula pynthikna ba kam shim la don kano kano ka jingktah ha kaban ai jingshakri ia ki jingjia kiba kyrkieh.
“Kala don katto katne ka jingktah hynrei kam dei pat kaba heh. Kumba long mynta, ki nongtrei ki dang leit ban trei ia la ka kam bad la ai ruh ia ka jingshakri ia ki paitbah” ula ong.
