Pynrem ka NESO ba pyniap ia 6 ngut ki Naga ha Manipur | Dawa ia ka Sorkar Pdeng ban pynkut ia ka “dustur shu map beit”

Shillong, Jylliew 11 : Ka North East Students’ Organisation (NESO) kala pynpaw ia ka jingpynrem kaba jur tam halor ka jingpyniap ia ki hynriew ngut ki shynrang Naga kiba dei na Konsakhul Naga Village ha Manipur, ia kaba la lap ia ki dkhot met jong ki ha ka 10 tarik Jylliew, jan shibnai hadien ba ki shah rahbor na shnong Leilom Vaiphei, kaba la jia ha ka 13 tarik Jymmang 2026.

Ka NESO, kaba dei ka Synjuk ba hakhlieh duh jong ki phra tylli ki seng ki samla pule na kylleng ki jylla ka thain Shatei Lam Mihngi ba kynthup ia ka AASU, KSU, GSU, AAPSU, NSF, AMSU, MZP bad TSF, kala ong ba ka “Sngew shyrkhei shikatdei eh” ia ki khubpr ba kine ki lanot kila shah pynshitom bein hashuwa ba kin shah pyniap dusmon bad shah ot dkhot met.

Ka NESO ka ong ba kane ka rukom leh ba tohmet bha ka pyni ia ka jingbym shuh ka jingiatip para briew bad ba kane ka jingjia kala pynkyndit ia ka jingsngew jong ka thain baroh kawei, kaba long kum ka jingpynkynmaw ia ka jingnang sniew ka jinglong jingman ha Manipur.

Haba pynpaw ia ka jingsngewlem sha ki longiing ba shem ia kane ka apot bad ki briew jong ka Konsakhul Naga, ka NESO ka ong b aka ieng ha syndah bad kito kiba la shah knieh jynthet iala ki baieid bathoin ha kane ka kam kaba shyrkhei bad ba khlem ka jingpyrkhat
Ka Seng ka dawa ia ka jingtohkit ba mardor, kaba shai bad ka bym shah liang halor kane ka kam bymman ba shyrkhei, bad ong ba man ki briew kiba donkti, kampher ia ka jingdon jingiadei badno badno ne don kyrdan, dei ban ithuh, kem bad pynshitom bad ban bishar hok khlem ka jingpynslem.

Kala maham ba ka jingbym leh eiei kan nang pynshlur shuh shuh ia kine ki briew ba kin leh ia kum ia kane ka kam khlem ka jingsheptieng ia ki jingpynshitom.

Ka NESO kala pynpaw ba ha kine ki lai snem bala leit, kala iai ialap halor ka jingsuk, ka jingiakren sngewthuh bad ka jingia suk ha Manipur bad iai kyrpad ia baroh ki kynhun ba don bynta bad ki borkhmih ba kin iada ia ki nongshongshnong bad ban shim ia ki sienjam kiba khlain ban pynkut ia ka jingiaum snam mar kylliang.

Wat hapdeng kine ki jingkyrpad bad ka jingbuh ia ka hajar ngut ki bor pahara ha Sorkar Pdeng, ka Seng ka ong ba ka jinglong jingman ka dang iai sniew shuh shuh.

Haba buh jingkylli ia ka Sorkar India, ka NESO kala kylli ba kumno ka lah ban long ba hadien palat lai snem jong ka jingia kynad bad ka jingbuh bun ki bor pahara, ym pat don uwei ruh u nongshah kynnoh ha kine ki jingpyniap briew bym lah ban niew shuh, ki jingrahbor, jingthang iing bad ki kam rukom kiba la shah pynngat ha ki kyndon ain bad shah tynrong ia ka jingkitkhlieh.

Kala pynpaw ruh ia ka jingsngewkhia kaba jur halor ka jingkynnoh ba shah liang ki bor ka Sorkar Pdeng, haba pynpaw ba kino kino ki jingiadon bynta lang ban leh ia ki kam bymman, ka jingkhein sting, ka jingiasuhbuit lane leh shiliang da ki bor pahara bala bynshew ban pynneh ia ka suk ka sain bad iada ia ki nongshongshnong, ka dei ka jingshet kylla kaba shyrkhei ia ka jingshaniah u paidbah bad ka dei ban ngat ha ki jingpynshitom kat kum ka ain.

Ka NESO ka ban biang ba ka jingsuk kaba neh ha Manipur ka lah ban wan tang lyngba ka jingbishar hok, ka jingtynrong ia ka jingkitkhlieh bad ka jingai jingiada ba mar katjuh ia baroh ki Jaidbynriew.

Kala dawa ia ka Sorkar India ban shim ia ki seinjam kiba shai ha kaban wanrah pat ia ka jingshaniah u paidbah, pynthikna ia ka jingshngain jong baroh ki nongshongshnong bad ban pynkut noh ia ka dustur ban shu map kaba aiding ia ki kam umsnam.