Nongpoh, Jylliew 11 : Ka Wah Umlew Protection Committee jong ki 9 tylli ki Shnong kiba hap hapoh ka thain Nongtraw, Ri-Bhoi District, kila dawa ia ki bor ka Sorkar Jylla ba kan tuklar bad ai jingiada lem ia ka Wah Umlew, kaba la kylla long ka wah umktieh tang namar ka jingtih khyndew palat liam ha ka thain.
Ka Wah Umlew ka dei ka wah kaba sumar da ka Committee jong kine ki Shnong, kaba la iaid da ki phew snem khamtam hadien ba ka Sorkar kala pynkylla ruh ia katto katne ki bynta jong kane ka wah kum ka Fish Sanctuary-kaba dap da ki Kha-Saw, kiba la ithuh dang shen kum ki State Fish ne dohkha ka Jylla.
Kat kum ka jingong u Secretary ka Wah Umlew Protection Committee Bah Pynskhemlang Sohtun, kane ka wah kala kylla umktieh namar ka jingtih khyndew jong ka Dhar Construction Company ha ki thain Nongkohlew sha NEIGRIHMS.
“Ka Committee ka sngewkhia jur ia ka jingnang jaboh bad kylla umsaw jong kane ka wah, kaba la ri ka sumar da ka committee ban iada ia ki dohwah naduh bala khang ia kajingber bih, jingpynbthei bomb ne kawang jar” ula ong.
Ula pynpaw ruh ba ka Committee kam don ban kynthoh iano iano ruh ne kam pyrshah ia ki kam pynroi hynrei ka kwah ba kane ka kompani kan shim ia ki lad ki lynti ban iada na ka jingtih ne bret khyndew pathar, kaba pynsniew dur pynban ia kane ka wah.
“Watla kala don ka jingiakren bad u Manager jong ka Dhar Construction Company halor kane ka bynta hynrei kane ka kompani kam shym la shimkhia satia ia ki lad iada mariang kat haduh kine ki sngi” ula ong.
Ka Committee ka dawa ia ka Sorkar ba kan shimkhia bad tuklar lang ia kane ka bynta khnang ban lah iada ia kane ka wah bad ba kan ym don kano kano ka jingduhnong ia ki paidbah jong ki 9 shnong kiba pyndonkam ia kane ka wah.
Shuh shuh ruh, na ka liang ka committee ka la kyrpad ia ka sorkar jylla ban shimkhia lem na bynta ki lad jingiada ia kane ka wah Umlew khnang kan nym don kano kano ka jingduhnong ia ki paidbah jong kine 9 shnong kiba pyndonkam ia kane ka wah.
