Imphal, Jylliew 11: Ka jingia umsnam kaba dang jia thymmai ka la pynkhih win biang ia ka Jylla Manipur ha ka sngi Palei hadien ba ki riew kieng atiar ki bym lah ban ithuh, ki la hiar thma ia kawei ka shnong ha Kamjong district ha kaba arngut ki briew ki la iap bad arngut kiwei pat ki la mynsaw jur.
Kitei ki arngut kiba la khlad ki dei kiba la tip kyrteng kum u Letminlun Haokip (35 snem) bad u Lunminthang Haokip (23 snem) baroh arngut ki dei kiba shong ba sah ha ka shnong Kultuh. Kitei kiba mynsaw kiba la tip kyrteng kum u Jangkhomang (28 snem) bad u Kamminlal (27 snem) bad ia ki la pynkit mar mar sha Hospital ban ioh ia ka jingsumar.
Katkum ki pulit, katei ka jingshah thombor ka la jia ha ka por 4:30 mynstep ha kaba ki runar kiba la kynnoh ba ki don ki tiar siat kila synreit kuli naphang ia ki nongshong shnong.
“Ha ka por kumba 4:30 mynstep, ki runar kiba don tiar ki la hiar thma ia katei ka shnong.Arngut ki briew ki la iap katba arngut kiwei pat ki la mynsaw bad la pynkynriah noh ia ki sha hospital,” la ong u heh pulit.
La register ïa ka suo motu case hapoh ki kyndon ba ïadei jong ka Bharatiya Nyaya Sanhita (BNS), 2023, ba kynthup ïa ki jingshah kynnoh ba ïadei bad ka jingpynïap briew, ka jingthmu ban pynïap briew, ka jingthaw pynklumar, ka jingthang bad ka jingpyndonkam be-aiñ ïa ki tiar siat, ryngkat bad ki kyndon jong ka Arms Act. Ki bor pahara ki la pynlong ia ka jingthwet ban lap ia kiba donkti.
Kane ka jingshah thombor kaba thymmai ka long hapdeng ka jingjur ka jingkulmar ha ka jylla hadien ka jinglap ïa ki hynriew tylli ki met ïap kiba la ngeit ba ki dei napdeng ki Naga kiba la shah rahbor ha u bnai ba la dep ha ka por ba don ka jingshah rah bor kiba ïadei bad ka jingïakynad hapdeng ki jaidbynriew ha ka distrik Kangpokpi.
Ia kine ki metiap la lap ha ka sngi Balang hadien ka jingkhynra kaba jur bha ha kaba la don kumba 450 ngut eiei ki pulit ka Manipur, ki pulit CRPF bad ki shipai Assam Rifles.
Kane ka jingshah set ha ki nongrah bor ka la mih na ka jingjia hadien ka jingshah rahbor ha Kotlen ha ka 13 tarik u Jymmang.Hadien kane ka jingjia, la kynnoh ba 18 ngut ki Naga na ka shnong Konsakhul ki la shah rahbor ha ki kynhun Kuki ha Leilon Vaiphei, kaba la pynlong ïa ki kynhun Naga ban pynphai kylla da kaba rahbor kylla sa ia ki paidbah Kuki.
Ki bor ba dei khmih ki la pynkhlaiñ ïa ki lad jingïada ha kylleng ki jaka kiba don ka jingsngewkhia katba ki jingsngewkhia ba thymmai kala nang kiew halor ka jingshah thombor kaba dang mih biang ha ka jylla.
