Shillong, Jylliew 11 : U Symbud Myntri Rangbah Bah Sniawbhalang Dhar ula iathuh ba ka Sorkar Jylla ka dang ap ia ki jing ai jingmut ia kiwei pat ki lad ne ki buit tih par ba thymmai na ka Nongkhaii dewiong ka East Jaintia Hills hashuwa ban pyn long ia ka jingialang bad u Myntri Rangbah bad ban pynsngew ia kane ka kam sha ka Sorkar Pdeng.
“Nga la dep iakynduh ia ki nongkhaii dewiong na East Jaintia Hills. Ngi la don ia ka jingiakren kaba seisoh…bad mynta ngi dang ap ia ki ba kin aiti ia ki jingtyrwa ba iadei bad ka rukom tih dewiong ba thymmai sha ka Tnad Mining & Geology” ong u Bah Dhar.
U iathuh ba ki nongkhaii kila pynpaw ba ka jingtih par da ka jingstad saian ka dei ka bym iahap satia ha ri-lum Jaintia.
“Kila pynpaw ba ka jingtih dewiong da ka jingstad saian kam iahap satia ia ka thain. Ta ka daw ngi la ong ha ki ba kin aiti ia kiwei pat ki buit bad ki jingai jingmut. Ngi dang ap ia kane” ula ong haba bynrap “Mar syn aiti ia ka jingtyrwa, ngin sa ia shong jingialang lang”.
“U Myntri Rangbah un sa lum ia ka jingialang bad ngin sa iakren lang hapdeng ka Sorkar bad ki seng jong ki nongkhaii dewiong kiba dei na kyllang ki bynta jong ka Jylla” ula ong.
U Bah Sniawbha ula iathuh ba ki nongkhaii kila pynsngew ia artylli ki mat kiba kongsan ba donkam ban leh eiei.
“Nyngkong, ka jaka bala buh hapoh ka policy ba mynta ka heh palat. Kumta, ngi la kyrpad ia ka Sorkar India ban pynduna ia ka jaka. Kaba ar, ka jingtih dewiong da ka jingstad saian kam I iahap bad ka jinglong jingman ki jaka ha ri-lum Jaintia” ula ong haba iathuh ba ka Sorkar Jylla kan sa rah iakren ia kane ka kam bad ka Sorkar Pdeng.
