Shillong, Jylliew 10 : Ka Voice of the People Party (VPP) kala jakhom hapoh ka constituency u President Ardent M Basaiawmoit hadien ba bun ngut ki Nongialambad ki Nongkyrshan kila leit ban pyniasoh noh sha ka National People’s Party (NPP) ha ka sngi Balang, ha ka jingialang ba iapynlong lang ha Nongkrem.
Haba pdiang ia kine ki nongkitkam ka VPP, u kyrtong ka NPP sha ka elekshon shiteng samoi ka Shillong Lok Sabha Dr DRL Nonglait, ula pynpaw ba ka jingiaid ialap elekshon jong u, ka dei kaba la pynshong nongrim halor ki ishu u paidbah, ym ka jingdon jingiadei bad ki seng sain pyrthei.
“Ngam dei tang u kyrtong jong ka NPP namar nga la dep shimti lypa ia ki ishu jong u paidbah wat hashuwa ba ngan rung sha ka NPP. Ngan iai bteng ban buddien ia kine ki ishu. Nga dei u kyrtong jong u paidbah” ula ong ha ka jingialang.
U Dr Nonglait ula ban biang ia ka jingpynleit jingmut jong u halor ka jingpynrung ia ka ktien Khasi ha ka khyrnit ba phra ka Riti Synsahr ka Ri bad ban dawa pyntreikam noh ia ka Inner Line Permit (ILP) ban tehlakam ia ka jingrung kyrthep ki briew ba nabar.
Ula ong ba ki jingkyrshan ia u kila wan na baroh ki seng sain pyrthei.
“Ki nongialam na ki seng sain pyrthei bapher bapher kila iawan lang bad thaw ia ka kynhun kaba ki khot kum ka kynhun ki nongkyrshan u Dr DRL Nonglait….Kila dep ban pynlong ia ka jingialang bad kila khot sngewbha ia ki nongkyrshan ka NPP ruh namar ki dang iadon khyndiat ngut” ula ong.
Haba kular ban mihkhmat ia baroh ki nongthep vote lada shah jied, ula ong “Ngan leit sha Delhi ym tang na ka bynta ka NPP hynrei ia phi iwei pa iwei….Ka dei ia phi ban ong ia nga kaei kaba donkam ban leh, bad na ka liang jong nga, ngan trei met bad mynsiem, ngan aiti lut ialade na ka bynta jong phi, ki paidbah”.
U MLA barim ka Nongkrem Bah Lambor Malngiang ula pyniaid ia ka jingialang ban pynrung dkhot ia ki Nongialam bad nongkitkam ka VPP sha ka NPP.
U Nongialam ka VPP, haba batai ia ka jingkylla liang, ula ong ba ka jingbym sngewtynnad bad bymhun shuh bad ka party jong u kaba rim (VPP) kala pynlong ia u ban kynriah.
“Nga la mad shibun kiei kiei ha ka por ba nga don bad ka VPP. Bun ki briew kila shah pynbiej bad shah ialam bakla ha ka VPP” ula ong.
Ula kam ba ka jingkyrshan ia u Dr Nonglait kala nang kiew nang kiew bad kular ban ieng iasaid pyrshah ia ki jingkynthoh pyrshah jong ki liang ba ialeh pyrshah.
“Ngin iamih shakhmat bad ngin sa ai jingkren ha ki jingialap elekshon ban wan ban pynthikna ba ki briew kin nym shah pynbiej ha ki ktien jali jaum jong ki nongialam jong kiwei pat ki seng sain pyrthei. Ngi pynpaw ia ka jingkyrshan ba pura ia u Dr Nonglait bad ngi kwah ban pynthikna ia ka jingjop jong u. Ka lyer jong u Dr Nonglait kala beh kylleng ki jaka” ula ong.
Une u Nongialam ula iathuh khana ruh ia ki kam sain pyrthei ba ula leh ha ki snem bala leit. “Nga la kyrshan ia u Ardent Basaiawmoit ha u 2023. Nga dei uwei na ki nongai jingkren/nongialap. Nga la ai ruh ia ka jingkyrshan kaba pura ia u (L) Dr Ricky Syngkon”.
 kala jakhom hapoh ka constituency u President Ardent M Basaiawmoit hadien ba bun ngut ki Nongialambad ki Nongkyrshan kila leit ban pyniasoh noh sha ka National People’s Party (NPP) ha ka sngi Balang, ha ka jingialang ba iapynlong lang ha Nongkrem.){kind=link}