SHILLONG, Risaw 03: Ki tyllong khubor ki iathuh ba haduh mynta ka sengsain pyrthei Hill State People’s Democratic Party (HSPDP) kam pat ioh lad ban iakren bha bad ki 2 ngut ki MLA kiba la suba ban mih noh ban iakhun na kiwei ki party haka ilekshon 2023.
Lah ban kdew ba ka HSPDP haka ilekshon 2018 kala jop na ki 2 tylli ki konstirtwensi kata u bah Renikton Lyngdoh Tongkhar na Mawkyrwat bad u bah Samlin Malniang na Sohiong konstitwensi hynrei mynta ka kynti la suba ba baroh 2 ngut ki MLA ki lah ban mih noh ban iakhun noh kiwei ki party.
Haba pyrshang ban pynshisha, ki tyllong khubor ki iathuh ba haduh mynta ka HSPDP ka dang kwah ia baroh 2 ngut ki MLA ban iai neh bad ka Party hynrei ki 2 ngut ki MLA haduh mynta kim pat phah khubor la kin mih noh shisha ne kin dang iai neh beit bad ka party.
La iathuh ba haduh mynta ka HSPDP kam pat wad kyrtong ban pynieng na Sohiong konstitwensi hynrei la suba pat ba ka party kala pynkhreh iala u kyrtong naka jaka jong u Myntri ka tnat PHE u bah Renikton L Tongkhar ban iakhun na Mawkyrwat haka ilekshon 2023.
“Naka liang ka Party kan ap bad kan pyrshang ban ioh iakren shwa ia baroh 2 ngut ki MLA namar haduh mynta kim pat phah kyrwoh shaka party ia kaei kaba ki thmu naka bynta ka ilekshon 2023” ong ki Nongialam ka HSPDP.
La iathuh ruh baki nongialam ka HSPDP kin pyrshang ban iakren markhmat shwa bad baroh 2 ngut ki MLA ban ioh iaka jingshai bad hadien kane naka liang ka Party ruh kan sa shim iaka rai khatduh hashuwa ban pynkhreh pynbna kyrtong na kine 2 tylli ki konstitwensi.
