Shillong, Risaw 23: U MP ka Rajya Sabha ba marwei na Meghalaya u James PK Sangma ha ka sngi Thohdieng, ula iaroh ia ka Delhi Police kaba la shimkhia mardor ha kaban kem ia u Social Media Influencer u Amir Shokeen halor ka jingkynnoh ba ula kren beiñ ia ka jaidbynriew u samla na Tripura.
Haba thoh ha ka rynsan X, u Sangma ula ong, “Nga kwah ban ai ka jingiaroh ia ka Delhi Police halor ka jingshimkhia mardor pyrshah ia u Amir Shokeen, uba la shah kem hadien ba la saphriang ka video ka jongu kaba la kynnoh ba ula kynthoh beiñ ia ka jaidbynriew jong uwei u samla na ka Jylla Tripura.”
Kane ka jingjia kala pynmih ia ka jingbitar kaba jur bad la rejistar ia ka hapoh jongka Sadar Bazar Police Station hapoh jong ka Section 192, 196, 352 bad 353 jongka Bharatiya Nyaya Sanhita (BNS).
Haba pynrem jur ia ka kynthoh beiñ jaidbynriew ia ki paitbah ka thaiñ shatei lammihngi, u MP ula ong “Ka jingkren beiñ ia ki jaidbynriew ka thaiñ shatei lammihngi ha kano kano ka rukom ruh ka long ka bym lah ban pdiang satia bad ka jingshimkhia mardor kala long kaba kongsan ban pynkiar na kino kino ki jingleh bakla kiban jia nangne shakhmat”.
