Shillong, Nailur 03 : Ka Jaintia Students Union-Laskein Block Circle hynnin ka sngi U Blei kala leit ban jurip ka Laskein Community Health Centre (CHC) ban pynthikna ia ka jingud jingnam jong ki paidbah ba kane ka jaka sumar kala shakri khlem ki doktor ia ki paid nongpang.
U Samla Dapmain Suchiang, Publicity Secretary ka JSU ula ong, ka jingleit Jurip ka seng kadei hadien ba kala ioh ia ka jingujor na ki nongshong shnong ka thain ba ym juh don doctor khamtam ha ka por ba don ki jingjia aksiden haka por mynmiet bad kaba kham shitom kadei ia ki briew kiba duk kiba hap leit shaduh sha Jowai ban ioh iaka jingsumar.
“Ka seng ka maham tyngeh ba lada ka dang do shuh shuh kum kine ki jingujor, ka seng kan ym shongkli kti hynrei kan khang tala noh shi syndon ia kane ka jaka ai jingsumar. Ngi kyrpad ruh ia ka Tnad ka Koit ka Khiah ba kan Sngewbha ban shimkhia bad ban pynbiang ia ka jingeh jong u paidbah” la pynpaw u Samla Dapmain.
Ula ong, kadei ka kamram jong ka jaka ai jingsumar ban pynsuk ia kiba duk lane kiba donkam ia ka jingsumar kaba mardor bad ka kyrpad ruh ia ki nongtrei ban wan biang por khnang ba ki briew ba wan najan ne na jngai ki shnong ruh kin ioh ia ka Jing sumar kaba biang bad ba pura.
