Guwahati, Jylliew 6: Kawei ka reel ha social media kaba pyni ia kawei ka longkmie kaba niah kali ryngkat bad ka khynnah ba dang rit kaba shong ha lbong ka tyrpeng jong ka ha kali, ka la pynlong ia ki pulit ban leh tyngeh ha Guwahati, ha kaba ki bor pyniaid ki la maham ba ym dei satia ban pyndonkam ia ki khynnah kum ki props na ka bynta ki jingthoh online.
Katkum u Guwahati Police Commissionerate, ka kynhun na Khanapara Traffic Outpost ka la lapdien ia ka Sabita Das kaba na Lakhimpur hadien ba katei ka video ka la paw online.La kynnoh ba katei ka dur, ka pyni ia ka, ba ka niah ia ka Tata Nexon, bad kawei ka khynnah rit, kaba shong ha lbong jong ka, katba ka kali, ka dang iaid.
Ha ka kylli jingkylli, ka Das ka la iathuh ha ki pulit ba ia katei ka video la ring hajan Beltola ha ka 2 tarik Jylliew ha ka por kumba 4:07 baje mynstep bad ba katei ka khynnah kaba la iohi ha katei ka video ka dei ka khun jong ka para jong ka.
Ki pulit ki la iathuh ba la ai jingmut ia ka shaphang ki jingma kiba lah ban mih na kum kane ka jingleh bad la maham ia ka ba kan nym leh biang ia kane.La sdang ruh ban pynshitom da ka ain katkum ka Section 184(f) jong ka Motor Vehicles Act.La kurup ruh ia ka laisen niah kali jong ka bad mynta ka dang don ha ka jingpynkhreh ban pynngat ha ka suspention ia ka.
Ka khubor kaba tyngeh, ki Pulit ka Assam ki la ong, “Ki khynnah kim dei ki props na ka bynta ki jingthoh ha ka social media.Ym don kam reel, ne ka khyllipmat jong ka jingmut jingpyrkhat online kaba buh jingma ia ka khynnah.”
Kane ka jingjia ka la mih ka jingïakren kiba thymmai ha kylleng ki jinglong ba don jingkitkhlieh ha ki social media bad ka jingïada ha surok, khamtam haba ki khynnah ki don bynta.
