Nongpoh, Jylliew 01: Ki artylli ki Dorbar Shnong ka Ri-Bhoi District, kila pynpaw ia ka jingbitar bad ka jingbym lah ban pdiang halor ka jingkynnoh lehdonbor kawei ka kynhun Sengbhalang, kaba pynbor ia ka kompani ba pyntrei ia ka project Umiam Stage-III ban pynsangeh ia ka kam bad khlem siew ia ka bainong jong ki nongtrei kiba dei ki trai Jylla.
Kine ki Dorbar Shnong ki kynthup ia ka Shnong Nongdiengngan bad ka Nongmahir, Ri-Bhoi District, kiba don sawdong ka pung Nongmahir, kawei na ki jaka ba khring ia ki nongshangkai kaba la tip ruh kum ka Mahsheer Sanctuary.
Kine ki Dorbar Shnong ki iathuh ba dang ha ki khyndiat sngi, kawei ka kynhun Sengbhalang (khlem da jer kyrteng), kala leit ban khynra Labour Licence ha ka jaka ba pyntrei ia ka project pynmih bording ka Umiam Stage –III, kaba hap hapoh u pud u sam jong ki ar Dorbar Shnong bad kynnoh ba ki dkhot Sengbhalang kila shoh la dat ia ki nongtrei bar jylla kynthup ia kiba dei ki trai shnong haduh ba ka kompani kala pynsangeh syndon ia ka jingtreikam ha kane ka project.
U Rangbah Shnong ka Nongdiengngan Bah Dip Pathaw bad u Secretary Shnong ka Nongmahir Bah J Thangkhiew, kila pyn paw ia ka jingsngewkhia kaba jur halor ka jingleh donbor kane ka Sengbhalang bad ong ba kane kala ktah ia ka iohkam iohkam jong ki nongshongshnong.
Ki iathuh ba ka kompani kala pynsangeh ia baroh ki kam jong kane ka project hadien ka jingshah shoh ki nongtrei bylla.
Kila kynthoh “Kum ki Nongialam Shnong kim don satia ia kano kano ka jingpyrshah halor ka jingwan khynra ia ki kot ki sla ki nongtrei bar jylla, hynrei kum ki Sengbhalang ki dei ban iatreilang bad ki Dorbar Shnong kiba tip kham bha halor ki project kiba dang iaid ha ki shnong ki thaw khamtam ban lait na ki jingjia kiba ktah ia ka shongsuk shongsain bad kiba ktah ia ka kamai ka kajih ki trai muluk”.
Kine ki Nongialam Shnong kila kyrpad ia ki bor ba dei khmih jong kane ka project ha Umiam Stage-III ba kin pynbeit noh ia kane ka kam khnang ba ka kompani kan lah ban sdang pyntrei biang ia ka project bad aikamm ia ki nongshongshnong.
