Shillong, Jymmang 29 : Ka Meghalaya bad Assam kila mynjur ban shim ia ki sienjam kiba donkam mardor ban pynjai jai noh ia ka jingiakynad ha Lapangap, ong u Myntri Rangbah ka Jylla Conrad K Sangma ha ka sngi Thohdieng hadien ka jingiakynduh bad u Myntri Rangbah ka Assam Himanta Biswa Sarma ha Guwahati.
Met with the Hon’ble Chief Minister of Assam, Dr. @himantabiswa ji, to discuss the concerns faced by residents of Lapangap and the tensions between the neighbouring villages. We had a constructive discussion on measures to ease tensions and maintain peace and law and order. Urge… pic.twitter.com/rWJCvZlD13
— Conrad K Sangma (@SangmaConrad) May 29, 2026
U Conrad ula ong ba kane ka jingialang ka long “Kaba sngewtynnad bad kaba tei bha” bad kala pynleit jingmut halor ka jingiakynad kaba jia ha Lapangap, kaba la pynsngewkhia ia baroh arjylla ha kine ki taiew bala leit.
“Ha ryngkat u Symbud Myntri Rangbah Bah Sniawbhalang Dhar, ngi la iakynduh ia u Myntri Rangbah Himanta Biswa Sarma hapoh ka Ophis treikam jong u ha Guwahati” ong u Conrad.
“Ka jingthmu ba hakhmat eh jong kane ka jingleit jong ngi ka long ban iakren halor ka jinglong jingman ba dang long mynta ha Lapangap kaba don ha khappud ka Meghalaya-Assam” ula ong.
Ula bynrap ba ki jingpyrshang ban iakynduh ia ki kynhun ba don bynta, kala iaid mynta da ki taiew.
“La bun sngi mynta bad kot da ki taiew, ngi la pyrshang ban wanrah ia ki kynhun bapher bapher kiba iadon bynta, ban iapynbeit ia ki jingeh bad ban wad ia ka lynti ban iaid nangne shakhmat” ula ong.
Ki Ophisar na baroh artylli ki Sorkar Jylla, kynthup ki bor District, kila iashimbynta ha ka jingialang.
“Ngi la pynbeit ia katto katne ki sienjam kiba lah ban iarap ia ngi ban pynjai jai ia ka jinglong jingman bad ki Ophisar ba dei khmih ia ka kam, kin sa shim ia ki sienjam ha kine ki khyndiat sngi ban wan bad pyrshang ban pynbeit ia kane ka kam” ong u Conrad.
Ula kyntu ia ka jingiatreilang na ki nongshongshnong bad ki Ophisar na baroh arliang jong ka khappud.
“Ngi dei ban iatreilang ha ka lynti ba don jingkyrmen bad ngi dei ban trei ha ka rukom kaban tei bad ban iashaniah mar kylliang bad trei ha ka rukom ba ngin lah ban shem ym ia ka lynti pynbeit kaba shipor hynrei ka ban neh slem” ula ong.
Halor ki kam kajia pud ha kylleng ki jaka, u Conrad ula iathuh ba ka jingiakren pynbeit pud kan long hadien ba la pyndep pura ia ka kam thaw ia ka Kynhun Myntri ha ka Sorkar Assam.
“Ngi la iarai ruh ba hadien bala dep thaw ia ka Sorkar ba pura ha Assam haba iadei bad ki Kynhun Myntri, shisien ba kila dep shim smai, ka jingiakren ia ka kam pynbeit pud kan sa sdang biang” ula ong.
