Imphal, Jymmang 29: Ka jingïakynad kaba thymmai ka la mih ha Manipur ha ka sngi Thohdieng ha kaba uwei u nongñiah trok bym dei na Manipuri u la ïap, uwei u Pulit ka Manipur u la mynsaw na ki kuli, bad san ngut ki kynthei Kuki ki la mynsaw malu mala ha ki jingjia ba kyrpang kiba don ka ïadei bad ka jingïakynad ha shi lynter ka surok bah National Highway-202 ha Ukhrul district.
Utei u nongñiah trok u la ïap bad ki pulit ki la mynsaw ha ka jingshah thombor jong ki lehnoh hajan ka TM Kasom, kaba jngai kumba hynriew kilomitar na ka shnong Shangkhai Kuki, hapdeng ka jingpyrshang jong ki bor pahara ban plie biang ïa ka surok Imphal–Ukhrul bad ban pynthikna ïa ka jingïaid jong ki kali kiba kit ïa ki marbam ba donkam sha Ukhrul.
Ki tyllong khubor ki la ïathuh ba ki bor pahara ki la ïashim bynta naduh mynstep ban pynkhuid ïa ki jingkhang lynti, kala don ka jingsiat da ki bom pynsat khmat bad u mock bombs ban pynpra ia ka kynhun ki nongiakhih ha surok bah.Hapdeng kane, la iathuh ba ki suba lehnoh ki la siat hajan u TM Kasom, kaba la pynlong ia u nongniah trok ban iap bad mynsaw kuli ia uwei u pulit ka jylla.
U pulit ba la mynsaw, u dei uba trei ha Litan Police Station, ha kaba la ai jingsumar shwa ban pynkynriah noh sha Jawaharlal Nehru Institute of Medical Sciences (JNIMS), Imphal, na ka bynta ban ioh ia ka jingsumar kaba kham bniah.
Ki bor pahara mar mar kila poi biang ha katei ka jaka, katba la pynlong ia ki jingwad bad ki jingkhynra ia ka jaka ban lap ia kiba donkti ha katei ka jingshah thombor.
Ha kajuh ka por, ki bor shnong jong ka Shangkhai ki la kynnoh ba san ngut ki kynthei Kuki ki la mynsaw malu mala na ka jingbthei jong ki bom pynsat khmat ha ka por ba ki don ka jingap pahara ban pynsuk ïa ka jingïaid jong ki kali kit mar ha shilynter ka surok bah. Katkum ka jingiathuh jong ka bor shnong, kine ki longkmie kiba la mynsaw ki la ioh ia ka jingsumar na ki bor pahara.
Kane ka jingjia kaba dang jia mynta ka wan hapdeng ka jingïakynad kaba dang ïai bteng ha ka thaiñ Litan–Ukhrul, kaba la sakhi ïa ki jingïakynad ba man ka por, ki jingkhang surok, bad ki jingkhynra da bor pahara ha kine ki bnai ba la dep. Ka jaka ka dang long kaba dang shongsyier ha ki bynta jong ka NH-202, ka lynti kaba dei ka budlum bad kaba kongsan kaba pyniasoh ia ka Imphal bad ka Ukhrul.
Kane ka jingjia ka la nang pynjur shuh shuh ïa ka jingïakynad ha shilynter ka surok NH-202, kaba la tip paidbah kum ka surok Imphal–Ukhrul, katba ki bor synshar ki dang bteng ïa ka jingpyrshang ban pynphai biang ïa ka jingïaid lynti kaba thikna ha shilynter ka surok bah.
