Shillong, Jymmang 29 : Ka Myntri Khynnah ki kam ialehkai ka Ri Raksha Khadse ha ka sngi Thohdieng ula shong bishar kam halor ka kam ialehkai ka Jylla Meghalaya bad ka lynti iaid bala shim ha ka roi ka par ki samla bad u Myntri kam ialehkai ka Jylla Bah Wailadmiki Shylla, bad ban jur ia ka jingklop lang hajuh hapdeng ki skhim ka Sorkar Pdeng bad ka Jylla ban wanrah ia ka lynti kaba kham skhem na ka bynta ki nongialehkai.
Ha kane ka jingialang, kaba long ha Shillong, la iashimbynta da u Commissioner and Secretary Dr Vijay Kumar D, ki Heh Ophisar na ka Sorkar Jylla, ka Sports Authority of India bad ki nongmihkhmat na ka Meghalaya State Olympic Association.
La iakren sani halor ka rukom long ki kam ialehkai hapoh ka Jylla, ki prokram ban pyniadon bynta ia ki samla, ki project jingtei bad ki prokram na ka bynta ka jingpynroi ia kisap ki nongialehkai kiba thmu ban pynkhain ia ka jingiashimbynta na man ki jaka bad thaw ia ki lynti naka byntaka jinglong kynsai ha ki kam ialehkai.
Ka Jylla kala ai jingbatai ia ki rukom ai jingkyrshan jong ka ia ki nongialehkai.
Ki Ophisar kila pyntip ba jan 900 ngut ki nongialehkai kila ioh jingkyrshan mynta hapoh ka State Sports Scholarship Scheme nalor ki jingai grant ban kyrshan ia ki samla bad ki kam ba iadei bad ki jingialehkai, ki skhim ban pynroi ia ka sap ki samla bad ka scholarship na ka bynta ki nongialehkai.
Ka bynta kaba kongsan jong kane ka jingbishar kam kala long eh halor ka Chief Minister’s Football Mission. Kane ka sienjam ka shim ia ka jingaimynsiem n aka South Americal Football Development Model kaba jop bad mynta kala treikam lyngba ki 125 tylli ki grassroot centre, kaba kyrshan ia kumba 10,000 ngut ki nongialehkai bad kala noh synniang sha ka jingmih kiba bun ki nongialehkai phutbol ba ialehkai shabar Ri na Meghalaya.
Lah shim jingkhein ruh halor ka jingiaid jong ki jingtei ia ki madan ialehkai ba kynthup ia ka Mawkhanu Football Stadium, kaba la iohi kum kawei na ki football stadium ha hehduh ha ka thain bad la shim ia ka kum ka jaka kaba biang eh ban plie ia ka National Games.
Ka jingialang kala iakren ruh halor ka Umsawli Sports Complex. Ki Ophisar kila bynrap b aka Slalon Centre ha Umtham kala mih kum kawei na ki jaka ialehkai water sports ba nyngkong eh ha ka ri bad ka jingai jinghikai.
Ka Khadse kala ban jur ia ka jingkongsan ban pynkhlain ia ka rukom treikam ha ki kam ialehkai naduh ki shnong ki thaw, pynshlur ia ka jingiashimbynta ki samla bad pynthikna ia ka jingklop lang hajuh ia ki skhim ka Sorkar Pdeng bad Jylla ba kan kham paw kam bha.
Halor ka prokram na ka bynta ki samla, ka jingialang kala shong bishar kam ia ka Youth Engagement and Empowerment Scheme na ka bynta ki samla pule lane ka YESS Meghalaya, kaba ai jingkyrshan ia ki club bad ki seng kiba pynlong ia ki prokram na ka bynta ki samla.
Ka jingiakren kala long ruh halor ka Meghalaya Games bad ka jingpynwandur ia ka plan na ka bynta ka jingpynroi ia ki sap jong ki nongialehkai.
Haba iaban halor ka jingkyrshan ka Sorkar Pdeng, ka Khadse kala ong “Ka Ministry ka ai ka jingkular ba kan iatreikam iajan bha bad ka Sorkar ban pynkhlain ia ki jingtei ia ki madan ialehkai, ki rukom treikam ban kyrshan ia ki nongialehkai bad ka roi ka par ki samla ha baroh kawei ka Jylla bad ka thain Shatei Lam Mihngi”.
