Shillong, Jymmang 26 : Ka Meghalaya Assembly Committee on Government Assurances ha ka sngi Ba-ar, kala hiar jurip ia lai tylli ki project madan ialehkai-ka Indoor Stadium ha Umsawli, ka Mawkhanu Football Stadium ha East Khasi Hills bad ki jingtei jong ka Water Sports ha Umtham, Ri-Bhoi.
Ia kane ka kynun la ialam da u Chairman ka Committee bad MLA ka Mawkyrwat Bah Renikton Lyngdoh Tongkhar. Ki dkhot kiba donlang ki kynthup ia ka Dr Ampareen Lyngdoh, MLA ka East Shillong, Dr Celestine Lyngdoh, MLA ka Umsning bad Bah Ollan Sing Suin, MLA ka Mawsynram.
Hadien ka shong bishar ia ka Stadium ha Mawkhanu, u Bah Ranikton ula pynpaw ba u “sngew sarong ba madan phutbol ba heh duh ha India la tei hapoh ka Jylla”.
“Ngi dei ban ai khublei ia u Myntri Rangbah Conrad K Sangma namar ka jingshimkhia jong u ban wanrah ia kane ka project ha Meghalaya” ula ong.
Kane ka stadium ka ban don jaka shong haduh 40,000 ngut ha Mawkhanu, ka dei kaba la pyntrei da ka Sorkar Jylla ha ka jingmang pisa ba kot T.732 klur. Kat kum ka tender, ka jingbuhpor ban pyndep ia kane ka stadium ka dei ha ki bynta jong ki bnai ba kut u snem 2028.
Ka Committee kala pynpaw ia ka jingsngewhun halor ka jingiaid ki kam bad pynpaw ia ka jingkhmih lynti ba ka project kan dep hapoh ka por bala buh.
Kane ka Committee kala leit jurip ruh ia ka Water Sports Centre ha Umtham bad ka Tennis Court ha Umsawli.
U Bah Renik u ong ba u sngewbha eh bad baroh ki kam pynroi bala pyntrei ha New Shillong khamtam eh ki surok.
“Ka pynkyndit ia nga bad kiwei ki dkhot ban iohi ia ki kam pynroi kiba mih hangne ha New Shillong” ong u Bah Renik.
U kyrmen ba baroh ki project bala pyntrei ha New Shillong kin dep hapoh ka por bala buh khnang ba ki nongshongshnong kin ioh pyndonkam ia ki.
Ki Ophisar kila synran ia ka kynhun ki kynthup ia u BDO ka Mawryngkneng Block Sanjay D Shira, Chief Engineer 9Sports) Manhiam Marbaniang bad ki Nongmihkhmat na ka PC Project Lted, lem bad u contractor ka stadium phutbol.
