Dibrugarh, Jymmang 19: Ki kynhun pulit na Jang bad Lumla police station jong ka Arunachal Pradesh ha ka sngi Nyngkong ki la pynlong ïa ka jingkhynra ban pynshisha ïa ka Inner Line Permit (ILP) hapoh bad sawdong ka shnong Jang bad Lumla jong ka Tawang district, ha kaba ki la lap ïa ki 11 ngut ki nongbylla bym dei trai shnong kiba trei khlem ki kot ki sla ILP kiba biang.
Haba thoh ha ka X, ka myntri kam pohïing jong ka Arunachal Pradesh u Mama Natung u la thoh kumne: “Ha ka jingkhynra ILP ba la pynlong da ki pulit jong ka Jang bad Lumla ha ka 18 tarik u Jymmang, la lap ïa ki 11 ngut ki nongtrei bym dei ki trai shnong kiba trei ha ki jaka shna ïing bapher bapher khlem ki kot ki sla kiba biang, ha kaba la pynkheiñ ïa ka BEFR Act. La sdang ïa ki jingtohkit kiba donkam katkum ain”
“Ka jingbud ryntih ïa ka aiñ ka long kaba ym lah ban ïakren.Baroh ki riew shimet kiba wan na shabar ka jylla na ka bynta ka kam, ryngkat bad ki kontraktor bad ki agency kiba wanrah ïa kum kine ki nongtrei, la bthah ba kin bud ryntih ïa ki kyndon jong ka ILP bad pynthikna ba baroh ki kot ki sla kiba donkam kin dang treikam ha man la ka por,” la bynrap biang u Natung.
Hadien ka jinglap ia kine, ki pulit ka Jang Police Station kila register ia ka Non-FIR Part-IV Case No. 02/2026 under Section 3 jong ka Bengal Eastern Frontier Regulation (BEFR) Act ha ka 18 tarik u Jymmang, 2026, bad kila sdang ban leh katkum ka ain pyrshah ia kine ki briew kiba pynkhein ia ka ain.
Ha kajuh ka por, ki pulit ki la ai jingmut ruh ïa ki local contractor bad ki trai ïing ba kin pynthikna ba baroh ki nongbylla bad ki nongtrei kiba nabar ka jylla ki dei ban don ïa ki ILP kiba biang bad kiba la pynthymmai ne update ha ki jaka shna jingshna.
Ka kynhun myntri sorkar jong ka Arunachal Pradesh, kaba la pyniaid da u Myntri Rangbah ka jylla u Pema Khandu, dang shen ka la mynjur ia ki lad ki lynti ban pynlong ia ka rukom treikam jong ka ILP kaba kham pyrkhing.
Kane ka rai ka la wan hadien ka jingkhang khyrdep kaba 36 kynta kaba la pynjari ha ka 14 tarik u Jymmang da ka Scheduled Tribe Bachao Andolan Committee, kaba dei ka seng na kane ka thaiñ.Kane ka jingkhang khyrdep ka la pynthut ïa ka jingim ba man ka sngi ha ki katto katne ki bynta jong ka jylla ba khappud bad ka Assam, khamtam eh ha Itanagar bad Naharlagun.
Ka ILP kaba la ai hapoh ka Bengal Eastern Frontier Regulation jong u snem 1873, ka dei ka kot leit jingleit kaba donkam bha na ka bynta ki nong India ki bym dei ki nongshong shnong ba pura jong ka Arunachal Pradesh ban rung sha kane ka jylla.
 hapoh bad sawdong ka shnong Jang bad Lumla jong ka Tawang district, ha kaba ki la lap ïa ki 11 ngut ki nongbylla bym dei trai shnong kiba trei khlem ki kot ki sla ILP kiba biang.){kind=link}